എടച്ചേരി (കോഴിക്കോട്)
ഉക്രൈനിൽ റഷ്യൻ ആക്രമണത്തിന്റെ ഭയാനകതയും കെടുതികളും നേരിൽകണ്ട എടച്ചേരി സ്വദേശിയും മലോൽ ശരീഫിന്റെ മകനുമായ വിനീഷ്യ മെഡിക്കൽ കോളജ് ഒന്നാം വർഷ വിദ്യാർഥി റഷാദ് മുഹമ്മദ് ഫോണിലൂടെ തന്റെ ആശങ്കകൾ സുപ്രഭാതവുമായി പങ്കുവച്ചു.

"ഞാൻ റഷാദ് മുഹമ്മദ്, യുക്രെയിനിലെ വിനീഷ്യ നാഷനൽ മെഡിക്കൽ യൂനിവേഴ്സിറ്റിയിൽ ഒന്നാം വർഷ എം.ബി.ബി.എസ് കോഴ്സിന് പഠിക്കുന്നു. ഇവിടെ ആക്രമണം തുടങ്ങിയത് മുതൽ മെഡിക്കൽ വിദ്യാർഥികളായ ഞങ്ങൾക്ക് ഭയരഹിതമായി ഒന്ന് ഉറങ്ങാൻ പോലും സാധിച്ചിട്ടില്ല. ഭക്ഷണം കഴിച്ചിട്ടും ദിവസങ്ങളോളമായി. ഏതു സമയവും എന്തും സംഭവിക്കാമെന്ന രൂപത്തിലാണ് കാര്യങ്ങളുടെ കിടപ്പ്. സദാസമയവും കാതടപ്പിക്കും വിധം സൈറൺ മുഴങ്ങിക്കൊണ്ടേയിരിക്കും. പരിഭ്രാന്തരായി ബങ്കറുകളിലേക്ക് ഓടിയൊളിക്കുമ്പോഴും ഉള്ളിൽ ഒറ്റ പ്രാർഥന മാത്രം. പഠനം നിലച്ചാലും ജീവനോടെ വീട്ടിലെത്തണം. ഉറ്റവരെയും ഉടയവരെയും കാണണം.

ഏതു നിമിഷവും തളർന്നു വീണേക്കാമെന്ന അവസ്ഥ. ഏതെങ്കിലും വിധത്തിൽ ഉക്രൈൻ അതിർത്തി കടന്ന് കിട്ടിയാൽ അയൽ രാജ്യങ്ങളായ പോളണ്ടിലേക്കോ റൊമാനിയയിലേക്കോ പോയി അവിടെ അഭയംതേടി നാട്ടിലേക്ക് എത്താമെന്ന പ്രതീക്ഷയിലാണ് ഞാനും കൂട്ടുകാരും. പക്ഷേ, എല്ലാ വഴികളും അടഞ്ഞുകിടക്കുന്നു. ഒരുപാട് ബുദ്ധിമുട്ടി അതിർത്തികളിൽ എത്തിയ കുട്ടികൾ അവിടെയുള്ള കൊടും തണുപ്പ് കാരണം അവരുടെ മനസു പോലെ ശരീരവും മരവിച്ചു പോവുകയാണ്. അവർക്കുമില്ല കഴിക്കാൻ ഭക്ഷണവും മാറാൻ വസ്ത്രങ്ങളും.
കുടിവെള്ളം പോലും ലഭിക്കാതെ നരകയാതനയിൽ കഴിയുന്ന ഒട്ടനവധി പേരുണ്ട് ഞങ്ങളുടെ കൂട്ടത്തിൽ. വിദ്യാർഥികളുടെ ദുരിതങ്ങൾ കണക്കിലെടുത്ത് നാട്ടിലുള്ള എല്ലാ പാർട്ടികളും എല്ലാ സംഘടനകളും ഇടപെട്ട് സർക്കാർ വഴി എന്തെങ്കിലും ചെയ്യണമെന്നാണ് ഞങ്ങളുടെ അപേക്ഷ''. കേന്ദ്ര സർക്കാർ ഇക്കാര്യത്തിൽ അടിയന്തരമായി ഇടപെട്ട് ഇന്ത്യൻ വിദ്യാർഥികളുടെ ജീവൻ രക്ഷിക്കാനുള്ള നടപടികൾ കൈക്കൊള്ളണമെന്നും റഷാദ് അഭ്യർഥിക്കുന്നു.