കീവ്: അധിനിവേശത്തിന്റെ നാലാം ദിവസം ഉക്രൈന്‍ നിര്‍മ്മിച്ച ലോകത്തിലെ ഏറ്റവും വലിയ വിമാനം കീവില്‍ റഷ്യന്‍ സൈന്യം നശിപ്പിച്ചതായി വിദേശകാര്യ മന്ത്രി ദിമിട്രോ കുലേബു. ഉക്രേനിയന്‍ ഭാഷയില്‍ 'സ്വപ്നം' എന്ന് അര്‍ഥമുള്ള AN-225 'Mriya' എന്ന വിമാനമാണ് നശിപ്പിച്ചത്.

ഉക്രേനിയന്‍ എയറോനോട്ടിക്‌സ് കമ്പനിയായ അന്റോനോവ് നിര്‍മ്മിച്ചതാണ് ലോകത്തിലെ ഏറ്റവും വലിയ കാര്‍ഗോ വിമാനമെന്ന പേരിലും ഖ്യാതി നേടിയ ഈ വിമാനം.

''ലോകത്തിലെ ഏറ്റവും വലിയ വിമാനമായ 'മ്രിയ' റഷ്യന്‍ നിവാസികള്‍ കൈവിനടുത്തുള്ള ഒരു എയര്‍ഫീല്‍ഡില്‍ നശിപ്പിച്ചു. ഞങ്ങള്‍ വിമാനം പുനര്‍നിര്‍മ്മിക്കും. ശക്തവും സ്വതന്ത്രവും ജനാധിപത്യപരവുമായ ഉക്രൈന്‍ എന്ന സ്വപ്നം ഞങ്ങള്‍ നിറവേറ്റും,' ഉക്രൈന്‍ അവരുടെ ഔദ്യോഗിക ട്വിറ്റര്‍ ഹാന്‍ഡില്‍ നിന്ന് ട്വീറ്റ് ചെയ്തു. ഒപ്പം വിമാനത്തിന്റെ ചിത്രവും പോസ്റ്റ് ചെയ്തിട്ടുണ്ട്. 'അവര്‍ ഏറ്റവും വലിയ വിമാനം കത്തിച്ചു, പക്ഷേ ഞങ്ങളുടെ മ്രിയ ഒരിക്കലും നശിക്കില്ല'' ട്വീറ്റില്‍ പറയുന്നു.

എന്നാല്‍ വിമാനത്തിന്റെ നിലവിലെ അവസ്ഥ എന്താണെന്ന് സ്ഥിരീകരിക്കാന്‍ കഴിയില്ലെന്ന് അന്റോനോവ് കമ്പനി അറിയിച്ചു. ''നിലവില്‍, AN-225 വിദഗ്ധര്‍ പരിശോധിക്കുന്നതുവരെ, ഞങ്ങള്‍ക്ക് വിമാനത്തിന്റെ സാങ്കേതിക അവസ്ഥയെക്കുറിച്ച് റിപ്പോര്‍ട്ട് ചെയ്യാന്‍ കഴിയില്ല. ഔദ്യോഗിക സ്ഥിരീകരണത്തിനായി കാത്തിരിക്കുക'' കമ്പനി ട്വീറ്റ് ചെയ്തു.

വ്യാഴാഴ്ച ഉക്രൈന് നേരെ പൂര്‍ണ തോതിലുള്ള അധിനിവേശം ആരംഭിച്ചതുമുതല്‍ നഗരങ്ങളില്‍ റഷ്യയുടെ മിസൈലാക്രമണം തുടരുകയാണ്.