ബെർലിൻ
ഉക്രൈന് ടാങ്കുകളും മിസൈലുകളും മറ്റ് ആയുധങ്ങളും നൽകുമെന്ന് ജർമനി. റഷ്യക്കെതിരേ സാമ്പത്തിക നിയന്ത്രണങ്ങൾ ഏർപ്പെടുത്തുമെന്നും ജർമൻ ചാൻസലർ ഒലാഫ് ഷോൾസ് അറിയിച്ചു. 1,000 ടാങ്ക് വേധ ജാവലിൻ മിസൈലുകളും 500 സ്റ്റിങ്ങർ മിസൈലുകളും ഉടൻ ഉക്രൈനിലെത്തിക്കുമെന്ന് അദ്ദേഹം പ്രഖ്യാപിച്ചു. റഷ്യൻ അധിനിവേശം നിർണായക ഘട്ടത്തിലെത്തി നിൽക്കുകയാണ്. ഇത് യുദ്ധാന്തര ലോകക്രമത്തിനു ഭീഷണിയാണ്- ഒലാഫ് പറഞ്ഞു. പുടിന്റെ അധിനിവേശ സേനയ്‌ക്കെതിരേ സാധിക്കുന്ന തരത്തിൽ പ്രതിരോധിക്കുന്നതിന് ഉക്രൈനെ സഹായിക്കുകയെന്നത് നമ്മുടെ കടമയാണെന്നും ജർമൻ ചാൻസലർ വ്യക്തമാക്കി.

ഇതാദ്യമായാണ് ജർമനി വിദേശനയത്തിൽ കാതലായ മാറ്റംവരുത്തുന്നത്. സംഘർഷബാധിത മേഖലകളിലേക്ക് മാരകായുധങ്ങൾ കയറ്റിയയക്കില്ലെന്ന നയമായിരുന്നു ജർമനി നീണ്ടകാലം തുടർന്നുവന്നിരുന്നത്. 400 ജർമൻ നിർമിത ടാങ്ക് വേധ മിസൈലുകൾ ഉക്രൈന് നൽകാൻ നെതർലൻഡ്‌സിന് ജർമനി നിർദേശം നൽകിയിട്ടുണ്ട്. 9 ഡി-30 ഹോവിസർ പീരങ്കികളും മറ്റു ആയുധങ്ങളും ഉക്രൈനു നൽകാൻ സർക്കാർ അനുമതി നൽകിയിട്ടുണ്ട്. 14 സൈനിക വാഹനങ്ങളും 10,000 ടൺ ഇന്ധനവും ഉക്രൈനു നൽകുമെന്ന് സാമ്പത്തിക മന്ത്രാലയം അറിയിച്ചു.
27 അംഗ യൂറോപ്യൻ യൂനിയൻ രാജ്യങ്ങളിൽ സാമ്പത്തികമായി ഏറ്റവും കരുത്തുറ്റ രാജ്യമായ ജർമനിയുടെ സഹായത്തെ ഉക്രൈൻ പ്രസിഡന്റ് സെലൻസ്‌കി സ്വാഗതം ചെയ്തു. യുദ്ധവിരുദ്ധ സഖ്യം പ്രവർത്തിച്ചുതുടങ്ങിയെന്നാണ് അദ്ദേഹം ട്വീറ്റിയത്. റഷ്യ നടത്തുന്നത് ലജ്ജാകരമായ ആക്രമണമാണെന്നും ഉക്രൈന് സ്വയം പ്രതിരോധിക്കാൻ അവകാശമുണ്ടെന്നും ജർമൻ വിദേശകാര്യമന്ത്രി അന്നലെന ബെർബക് പറഞ്ഞു.യു.എസ് ഇതുവരെ 100 കോടി ഡോളറിന്റെ സുരക്ഷാ സഹായം ഉക്രൈന് നൽകിയിട്ടുണ്ട്. ഫ്രാൻസും കഴിഞ്ഞ ദിവസം ഉക്രൈന് സൈനിക സഹായം അയച്ചിരുന്നു.