ദുബൈ:അബുദബി കിരീടാവകാശിയും സായുധ സേനയുടെ ഡെപ്യൂട്ടി സുപ്രീം കമാന്‍ഡറുമായ ശൈഖ് മുഹമ്മദ് ബിന്‍ സായിദ് അല്‍ നഹ്യാന്‍ റഷ്യന്‍ പ്രസിഡന്റ് വഌദ്മിര്‍ പുടിനുമായി ഫോണ്‍ സംഭാഷണം നടത്തി.

പ്രാദേശിക, അന്തര്‍ദേശീയ വിഷയങ്ങള്‍ ചര്‍ച്ച ചെയ്തു. ഇരു രാജ്യങ്ങളും തമ്മിലുള്ള ഉഭയകക്ഷി ബന്ധവും ഓര്‍ഗനൈസേഷന്‍ ഓഫ് പെട്രോളിയം എക്‌സ്‌പോര്‍ട്ടിംഗ് രാജ്യങ്ങളുമായുള്ള (ഒപെക്) റഷ്യന്‍ സഹകരണത്തിന്റെ വെളിച്ചത്തില്‍ ഊര്‍ജ വിപണിയിലെ സംഭവവികാസങ്ങളും ഊര്‍ജ വിപണി സ്ഥിരത നിലനിര്‍ത്തേണ്ടതിന്റെ പ്രാധാന്യവും ചര്‍ച്ച ചെയ്തു.യുക്രെയ്‌നിലെ സംഭവവികാസങ്ങളെക്കുറിച്ച് റഷ്യന്‍ പ്രസിഡന്റ് ശൈഖ് മുഹമ്മദിനോട് വിശദീകരിച്ചു. പ്രതിസന്ധിക്ക് സമാധാനപരമായ പരിഹാരമുണ്ടാവണമെന്ന് ശൈഖ് മുഹമ്മദ് ആവശ്യപ്പെട്ടു.

നിലവിലുള്ള പ്രതിസന്ധിക്ക് സുസ്ഥിരമായ രാഷ്ട്രീയ പരിഹാരം കണ്ടെത്താന്‍ സഹായിക്കുന്നതിന് ബന്ധപ്പെട്ട കക്ഷികളുമായി യു.എ.ഇ ഏകോപനം തുടരുമെന്നും അദ്ദേഹം ഊന്നിപ്പറഞ്ഞു.