ബ്ലാസ്‌റ്റേഴ്‌സ് -3
മുംബൈ സിറ്റി -1

മുംബൈക്കെതിരെ ആവേശം നിറഞ്ഞ മത്സരത്തില്‍ ബ്ലാസ്റ്റേഴ്‌സിന് മൂന്ന് ഗോളിന്റെ ജയം. സഹലിന്റെയും അല്‍വാരോ വാസ്‌കസിന്റെയും ഗോളിലാണ് ബ്ലാസ്‌റ്റേഴ്‌സിന്റെ ജയം.

മലയാളി താരം സഹല്‍ അബ്ദുസ്സമദ് മനോഹരമായ സോളോ ഗോളോടെ തുടക്കമിട്ട സ്‌കോറിങ് ഇരട്ട ഗോളുമായി അല്‍വാരോ വാസ്‌ക്വെസ് ഏറ്റെടുത്തപ്പോള്‍ ആധികാരികമായാണ് തിലക് മൈതാനില്‍ മഞ്ഞപ്പട ജയിച്ചത്.

മലയാളി താരം സഹല്‍ അബ്ദുസ്സമദ്, ഈ സീസണിലെ ഏറ്റവും മികച്ച ഗോളുകളിലൊന്നുമായി മഞ്ഞപ്പടയെ മുന്നിലെത്തിച്ചപ്പോള്‍ ഹാഫ് ടൈമിന് നിമിഷങ്ങള്‍ മാത്രം ശേഷിക്കെ അല്‍വാരോ വാസ്‌ക്വെസ് ആണ് ലീഡുയര്‍ത്തിയത്. സ്വയം സമ്പാദിച്ച പെനാല്‍ട്ടി അല്‍വാരോ അനായാസം ലക്ഷ്യത്തിലെത്തിക്കുകയായിരുന്നു.

ആദ്യപകുതിയുടെ അവസാന ഘട്ടത്തില്‍ മുംബൈ സമനില ഗോളിനായി ആഞ്ഞുപിടിക്കുന്നതിനിടെയാണ് ബ്ലാസ്റ്റേഴ്‌സിന്റെ രണ്ടാം ഗോള്‍വന്നത്. പ്രത്യാക്രമണത്തില്‍ പന്തുമായി ബോക്‌സിലേക്കു കടന്ന വാസ്‌ക്വെസിനെ കാല്‍വെച്ചു വീഴ്ത്തുകയല്ലാതെ മുംബൈ പ്രതിരോധതാരം ഫാളിന് വഴിയുണ്ടായിരുന്നില്ല. തന്ത്രപൂര്‍വം കിക്കെടുത്ത വാസ്‌ക്വെസ് കീപ്പറെ എതിര്‍ദിശയിലേക്ക് പായിച്ച് പന്ത് വലയിലാക്കുകയും ചെയ്തു.

60ാം മിനുട്ടില്‍ മത്സരഗതിക്കെതിരായി വാസ്‌ക്വേസിന്റെ രണ്ടാം ഗോള്‍ വന്നു. ബോക്‌സില്‍ നിന്ന് പന്ത് ക്ലിയര്‍ ചെയ്യുന്നതില്‍ മുംബൈ കീപ്പര്‍ മുഹമ്മദ് നവാസിന് പിഴച്ചപ്പോള്‍ ആളൊഴിഞ്ഞ പോസ്റ്റിലേക്ക് തട്ടിയിടുക മാത്രമേ വാസ്‌കസിനുവേണ്ടിയിരുന്നുള്ളൂ. എഫ്.സി ഗോവക്കെതിരായ അടുത്ത മത്സരത്തില്‍ തോല്‍ക്കാതിരുന്നാല്‍ ബ്ലാസ്‌റ്റേഴ്‌സിന് 2016നു ശേഷം ആദ്യമായി സെമി കളിക്കാം.