രണ്ടാം പാദത്തിൽ ബഗാന് 1-0 ന്റെ
ജയം, അഗ്രഗേറ്റിൽ 3-2 ന്റെ ജയവു
മായി ഹൈദരാബാദ് ഫൈനലിൽ
ബംബോലിം
ഇന്ത്യൻ സൂപ്പർ ലീഗ് ഫുട്‌ബോൾ ഫൈനലിൽ കേരള ബ്ലാസ്റ്റേഴ്‌സിന്റെ എതിരാളി ഹൈദരാബാദ് എഫ്.സി. രണ്ടാം പാദ സെമി ഫൈനലിൽ എ.ടി.കെ മോഹൻ ബഗാനോട് തോറ്റിട്ടും ഹൈദരാബാദ് ഫൈനൽ ഉറപ്പിച്ചു. അഗ്രഗേറ്റിൽ 3-2 ന്റെ വിജയവുമായാണ് ഹൈദരാബാദിന്റെ കിരീട പോരിലേക്കുള്ള വരവ്. രണ്ടാം പാദ സെമിയിൽ ഏകപക്ഷീയമായ ഒരു ഗോളിനാണ് ബഗാൻ ഹൈദരാബാദിനെ വീഴ്ത്തിയത്.

ആദ്യ പാദത്തിൽ 3-1 ന് ഹൈദരാബാദ് ജയിച്ചിരുന്നു. 20 ന് ഫത്തോർദ സ്‌റ്റേഡിയത്തിലാണ് ബ്ലാസ്‌റ്റേഴ്‌സുമായി ഹൈദരാബാദ് ഐ.എസ്.എൽ ഗ്രാൻഡ് ഫിനാലെയിൽ ഏറ്റുമുട്ടുക. ആദ്യമായാണ് ഹൈദരാബാദ് ഐ.എസ്.എൽ ഫൈനലിൽ എത്തുന്നത്. ഞായറാഴ്ച ഫൈനലിൽ ആര് ജയിച്ചാലും ഇത്തവണ പുതിയ ചാംപ്യൻമാരുടെ ഉദയമാകും. കിക്കോഫ് വിസിൽ മുതൽ എ.ടി.കെ മോഹൻ ബഗാൻ ആക്രമണങ്ങളുമായി ഹൈദരാബാദ് ഗോൾമുഖത്തേക്ക് ഇരച്ചുക്കയറി. ഏഴാം മിനുട്ടിൽ പ്രബീർ ദാസിന്റെ തകർപ്പൻ ഷോട്ട് ഹൈദരാബാദ് ഗോൾ കീപ്പർ ലക്ഷ്മികാന്ത് കട്ടിമണി രക്ഷപ്പെടുത്തി. മുന്നേറ്റനിരയിൽ പ്രബീർ ദാസും റോയ് കൃഷ്ണയും ഹൈദരാബാദ് ഗോൾ മുഖത്ത് നിരന്തരം ആക്രമണങ്ങളുമായി നിറഞ്ഞാടി.
പക്ഷെ, ആദ്യപകുതിയിൽ ലക്ഷ്മികാന്ത് കട്ടിമണിയെയും പ്രതിരോധത്തെയും വീഴ്ത്താനായില്ല. ഗോൾ അടിക്കാനുള്ള ബഗാന്റെ ശ്രമങ്ങൾക്ക് കടുത്ത പ്രതിരോധമൊരുക്കിയാണ് ഹൈദരാബാദ് തടയിട്ടത്. മൂന്നു ഗോളിന് ജയിച്ചാൽ മാത്രമേ ബഗാന് ഫൈനലിൽ ഇടംപിടിക്കാൻ കഴിയുമായിരുന്നുള്ളു. ആക്രമണവുമായി രണ്ടാം പകുതിയിലും ബഗാൻ കളംനിറഞ്ഞാടി. 79ാം മിനുട്ടിൽ റോയ് കൃഷ്ണ ലക്ഷ്യം കണ്ടു.
ലിസ്റ്റൺ കൊളാസോയുടെ മനോഹരമായ ക്രോസിൽ നിന്നായിരുന്നു റോയ് കൃഷ്ണ ബഗാനെ മുന്നിലെത്തിച്ചത്. നിരവധി അവസരങ്ങൾ ലഭിച്ചെങ്കിലും ബാഗാന് ലീഡ് വർധിപ്പിക്കാനായില്ല.