മഞ്ചേശ്വരം: സ്‌കൂള്‍ ബസ് ബൈക്കില്‍ ഇടിച്ച് രണ്ടുപേര്‍ മരിച്ചു. മിയപദവ് സ്വദേശികളും മംഗളൂരു ശ്രീദേവി കോളജിലെ വിദ്യാര്‍ത്ഥികളുമായ അബി ബെജ്ജങ്കല (18), പ്രതിഷ് ഷെട്ടി (19) എന്നിവരാണ് മരിച്ചത്. കൂടെയുണ്ടായിരുന്ന മറ്റൊരു വിദ്യാര്‍ത്ഥി നമിത്ത് ഷെട്ടി കുളൂരിനെ (29) ഗുരുതര പരുക്കുകളോടെ മംഗളൂരിലെ സ്വകാര്യ ആശുപത്രിയില്‍ പ്രവേശിപ്പിച്ചു.

വെള്ളിയാഴ്ച രാവിലെ 7.30 ഓടെയാണ് അപകടം നടന്നത്. ഉപ്പള പത്വാടി ഭാഗത്ത് നിന്നും വരികയായിരുന്ന സ്‌കൂള്‍ ബസും, മിയപദവ് ഭാഗത്ത് നിന്നും ഹൊസങ്കടി ഭാഗത്തേക്ക് പോവുകയായിരുന്ന വിദ്യാര്‍ത്ഥികള്‍ സഞ്ചരിച്ച ബൈക്കും ബളിയൂര്‍ എന്ന സ്ഥലത്ത് വെച്ചാണ് കൂട്ടിയിടിച്ചത്. ഉപ്പളയിലെ സ്വകാര്യ ഇംഗ്ലീഷ് മീഡിയം സ്‌കൂളിലെ കുട്ടികളുമായി പോവുകയായിരുന്ന ബസ്സാണ് ബൈക്കില്‍ ഇടിച്ചത്.