ജിദ്ദ: അഞ്ച് രാജ്യങ്ങളിൽ നിന്നുള്ള 277,000-ലധികം ഹജ്ജ് തീർഥാടകർ മക്ക റൂട്ട് സംരംഭം നടപ്പിലാക്കി രണ്ട് വർഷത്തിനുള്ളിൽ അതിന്റെ പ്രയോജനം നേടിയതായി പാസ്‌പോർട്ട് ഡയറക്ടർ ജനറൽ (ജവാസാത്ത്) ലെഫ്റ്റനന്റ് ജനറൽ സുലൈമാൻ അൽ-യഹ്‌യ പറഞ്ഞു. ആഭ്യന്തര മന്ത്രാലയത്തിന്റെ നേതൃത്വത്തിലുള്ള നിരവധി മന്ത്രാലയങ്ങളുടെ സംയുക്ത പരിശ്രമം മൂലമാണ് ഈ സംരംഭം വിജയിച്ചതെന്നും അദ്ദേഹം പറഞ്ഞു.

ദുയൂഫ് അറഹ്മാൻ പ്രോഗ്രാമിന്റെ സഹകരണത്തോടെ ഹജ്ജ്, ഉംറ മന്ത്രാലയം സംഘടിപ്പിച്ച ഹജ്ജ്, ഉംറ സേവന സമ്മേളനത്തിൽ സംസാരിക്കുകയായിരുന്നു ജവാസാത്ത് മേധാവി. ഹജ്ജ് തീർഥാടകർക്ക് എക്കാലത്തെയും മികച്ച സേവനങ്ങളും സൗകര്യങ്ങളും വ്യാപിപ്പിക്കുന്നതിന് ഈ സംരംഭം സഹായകമായെഎന്നും അദ്ദേഹം കൂട്ടിച്ചേര്ത്തു.

സഊദി അറേബ്യ ആരംഭിച്ച മക്ക റൂട്ട് ഇനിഷ്യേറ്റീവിന് കീഴിൽ തീർഥാടകർക്കുള്ള പ്രവേശനത്തിനുള്ള പ്രൂഫ് ഓഫ് കൺസെപ്റ്റ് (പിഒസി) അവരുടെ രാജ്യങ്ങളിൽ നിന്നുള്ള എംബാർക്കേഷൻ പോയിന്റുകളിൽ നടത്തുന്നതാണ് പദ്ധതിയുടെ ഏറ്റവും വലിയ പ്രത്യേകത.

2018-ൽ നടപ്പാക്കാൻ തുടങ്ങിയ ആദ്യഘട്ടത്തിൽ ഇന്തോനേഷ്യയിൽ നിന്നും മലേഷ്യയിൽ നിന്നുമുള്ള ഹജ്ജ് തീർഥാടകരായിരുന്നു ഗുണഭോക്താക്കൾ. 2019 ലെ ഹജ്ജിന്റെ രണ്ടാം ഘട്ടത്തിൽ പാകിസ്ഥാൻ, ബംഗ്ലാദേശ്, ടുണീഷ്യ എന്നിവിടങ്ങളിൽ നിന്നുള്ള തീർഥാടകരും ഈ സംരംഭത്തിൽ നിന്ന് പ്രയോജനം നേടിയിരുന്നു. കൊറോണ വൈറസ് പൊട്ടിപ്പുറപ്പെട്ടതിനെത്തുടർന്ന് 2020, 2021 വർഷങ്ങളിൽ വിദേശ തീർഥാടകർക്കുള്ള ഹജ്ജ് താൽക്കാലികമായി നിർത്തിവെക്കുകയായിരുന്നു

സഊദിയിൽ എത്തുമ്പോൾ ചെയ്യേണ്ട എമിഗ്രെഷൻ പകരമായി പ്രീ-ക്ലിയറൻസ് സംവിധാനം, പുറപ്പെടുന്ന സമയത്ത് സ്വന്തം രാജ്യങ്ങളിൽ സാധ്യമാക്കുന്ന പദ്ധതിയാണിത്. സഊദി വിമാനത്താവളങ്ങളിൽ എത്തിച്ചേരുമ്പോൾ ഉടൻ തന്നെ ഇവർക്ക് പുറത്തിറങ്ങാൻ സാധിക്കുമെന്നത് തീർഥാടകരുടെ കാത്തിരിപ്പ് സമയം ഇത് ഗണ്യമായി കുറക്കുന്നുവെന്നതാണ് ഇത് കൊണ്ടുള്ള ഏറ്റവും വലിയ നേട്ടം.