ന്യൂഡൽഹി
പെട്രോളിയം ഉത്പന്നങ്ങളിൽ നിന്നുള്ള അധിക നികുതിയിൽ ഒരു ലക്ഷം കോടിയുടെ അധിക വരുമാനമുണ്ടെന്നും എന്നാൽ കോർപ്പറേറ്റ് നികുതി പിരിവ് രണ്ടു ലക്ഷം കോടി കുറഞ്ഞെന്നും കേന്ദ്ര സർക്കാർ. രാജ്യസഭയിൽ ഡോ. വി. ശിവദാസന്റെ ചോദ്യത്തിന് കേന്ദ്ര ധനമന്ത്രി നൽകിയ മറുപടിയിലാണ് ഈ കണക്കുകൾ.
2018- 19 വർഷത്തിൽ 6,63,571.62 കോടി രൂപയാണ് കോർപ്പറേറ്റ് നികുതിയായി ലഭിച്ചത്. 2020-21ൽ ഇത് രണ്ട് ലക്ഷം കോടിയോളം കുറഞ്ഞ്, 4,57,718.97 ആയി. 31 ശതമാനം കുറവാണുണ്ടായത്. 2018 -19ൽ ജി.ഡി.പിയുടെ 3.51 ശതമാനം ആയിരുന്ന കോർപ്പറേറ്റ് നികുതി, 2020 -21 ൽ വെറും 2.32 ശതമാനമായി. കോർപ്പറേറ്റുകൾക്ക് സർക്കാർ നൽകിയ നികുതി ഇളവുകളാണ് നികുതിവരുമാനം കുറയാൻ കാരണം.
സാധാരണക്കാരനെ ഏറ്റവുമധികം ബാധിക്കുന്ന പെട്രോളിയം ഉത്പന്നങ്ങളിൽ നിന്നുള്ള അധിക നികുതിയുടെ ചിത്രം നേരേ മറിച്ചാണ്. 2018-19ൽ മൂന്നരലക്ഷം കോടിയിൽ താഴെ ആയിരുന്നു പെട്രോളിയം ഉത്പന്നങ്ങളുടെ അധിക കേന്ദ്ര നികുതിയിൽ നിന്നുള്ള വരുമാനം (3,48,041 കോടി രൂപ ). 2020-21 ആയപ്പോൾ ഇത് 4,55,069 കോടിയായി. 107,028 കോടിയുടെ വർധന. അതായത് 2018-19 ൽ നിന്ന് 2020-21 ആയപ്പോൾ 31 ശതമാനത്തോളം വർധനയാണ് പെട്രോളിയം അധികനികുതിയിൽ ഉണ്ടായത്. 2018-19ൽ ജി.ഡി.പിയുടെ 1.84 ശതമാനം ആയിരുന്ന പെട്രോളിയം നികുതി, 2020-21 ആയപ്പോൾ ജി.ഡി.പിയുടെ 2.30 ശതമാനമായി ഉയർന്നു.
ആഗോള പട്ടിണി സൂചികയിൽ 100 രാഷ്ട്രങ്ങൾക്ക് പിന്നിൽ 101ാമതായി ഇന്ത്യ നിൽക്കുമ്പോഴും കൊവിഡ് മൂലം സാധാരണക്കാർ ദുരിതമനുഭവിക്കുമ്പോഴും അവരെ കൊള്ളയടിക്കുകയും കോർപ്പറേറ്റ് കുടുംബങ്ങളെ പ്രീണിപ്പിക്കുകയും ചെയ്യുന്ന രീതിയാണ് കേന്ദ്രം പിന്തുടരുന്നത് എന്നാണ് കണക്കുകൾ പറയുന്നത്.