തിരുവനന്തപുരം: അപൂര്‍വ്വ രക്താര്‍ബുദം ബാധിച്ച ഏഴുവയസുകാരന്‍ ശ്രീനന്ദന്റെ ജീവിതം തിരിച്ചുപിടിക്കാന്‍ നാട് ഒരുമിക്കുന്നു.
ശ്രീനന്ദന്റെ രക്ത മൂല കോശങ്ങള്‍ കണ്ടെത്താനുള്ള ശ്രമം തുടങ്ങിക്കഴിഞ്ഞു. തിരുവനന്തപുരം എ കെ ജി സെന്ററിന് സമീപമുള്ള ഹസന്‍മരയ്ക്കാര്‍ ഹാളില്‍ പ്രത്യേക പരിശോധന ക്യാമ്പ് പുരോഗമിക്കുകയാണ്. ഇന്ന് രാവിലെ മുതല്‍ എകെജി സെന്ററിനടുത്തുള്ള ഹസ്സന്‍മരയ്ക്കാര്‍ ഹാളില്‍ വൈകിട്ട് 5.30 വരെയാണ് ക്യാംപ്.

ക്യാംപില്‍ സാമ്പിളുകള്‍ കൊടുക്കാന്‍ നിരവധിയാളുകളാണ് എത്തുന്നത്. അഞ്ചല്‍ അഗസ്ത്യക്കോട് സ്വദേശി രഞ്ജിത്ത്ആശ ദമ്പതിമാരുടെ മകന്‍ ശ്രീനന്ദനാണ് അപൂര്‍വ്വങ്ങളില്‍ അപൂര്‍വ്വ രോഗവുമായി ആശുപത്രിയില്‍ കഴിയുന്നത്. ശരീരം രക്തം ഉല്‍പ്പാദിപ്പിക്കാത്തത് കൊണ്ട് രക്തം മാറ്റിവച്ചാണ് കുട്ടിയുടെ ജീവന്‍ നിലനിര്‍ത്തുന്നത്.

രക്തമൂലകോശം മാറ്റിവയ്ക്കുക എന്നതാണ് ഏക വഴി.അതിനായി രക്തകോശവുമായി സാമ്യമുള്ള ഒരു ദാതാവിനെ കണ്ടെത്തേണ്ടതുണ്ട്.എന്നാല്‍ ഇത് ലക്ഷത്തില്‍ ഒന്നു മാത്രമേ ഉണ്ടാവൂ. ഇതിനായി ഒരു ദാതാവിനെ തേടുകയാണ് ക്യാംപിലൂടെ കുടുംബത്തിന്റെ ലക്ഷ്യം.രാജ്യത്തും രാജ്യത്തിന് പുറത്തുമുള്ള ഡോണേഴ്‌സ് ലിസ്റ്റിലും ശ്രീനന്ദന് യോജിച്ചത് കിട്ടാതായതോടെയാണ് ക്യാംപ് നടത്താന്‍ തീരുമാനിച്ചത്.