പട്‌ന: ബിഹാറിലെ എന്‍.ഡി.എ സര്‍ക്കാറിനെതിരെ ആഞ്ഞടിച്ച് ബിജെ.പി എം.എല്‍.എ. ഭാരതീയ ജനതാ പാര്‍ട്ടി എം.എല്‍.എ ഹരിഭൂഷണ്‍ താക്കൂറാണ് സ്വന്തം സര്‍ക്കാരിനെതിരെ രൂക്ഷ വിമര്‍ശനവുമായി രംഗത്തെത്തിയത്. സംസ്ഥാനത്തെ ഭരണ സംവിധാനം അഴിമതിയില്‍ മുങ്ങിയിരിക്കുകയാണെന്ന് ഹരിഭൂഷണ്‍ ആരോപിച്ചു.

ഭരണത്തില്‍ അഴിമതി കടന്നുകൂടിയിട്ടുണ്ടെന്നും ഉദ്യോഗസ്ഥര്‍ അതില്‍ ഇടപെടുകയാണെന്നും അദ്ദേഹം മാധ്യമപ്രവര്‍ത്തകരോട് പറഞ്ഞു. അഴിമതി കേസുമായി ബന്ധപ്പെട്ട് താന്‍ മുസാഫര്‍പൂര്‍ പൊലിസ് സൂപ്രണ്ടിനെ ഫോണില്‍ സംസാരിച്ചിരുന്നുവെങ്കിലും ഒരു നടപടിയും ഉണ്ടായില്ലെന്ന് ഹരിഭൂഷണ്‍ ആരോപിച്ചു.

'ഞാന്‍ ഈ പാര്‍ട്ടിക്കാരനാണ്. എങ്കിലും എന്റെ അഭിപ്രായം പ്രകടിപ്പിക്കാന്‍ എനിക്കും അവകാശമുണ്ട്. ഭരണത്തിലെ ആഴത്തില്‍ വേരൂന്നിയ അഴിമതിക്കെതിരെയാണ് ഞാന്‍ നിലപാടെടുത്തത്. ഇതിനെതിരെ സര്‍ക്കാര്‍ കര്‍ശനമായ നടപടി സ്വീകരിച്ചില്ലെങ്കില്‍, പ്രത്യാഘാതങ്ങള്‍ നേരിടേണ്ടിവരും' അദ്ദേഹം കൂട്ടിച്ചേര്‍ത്തു.

ബിഹാറില്‍ മുഖ്യമന്ത്രി നിതീഷ് കുമാറിന്റെ ജെ.ഡി.യുവുമായി സഖ്യത്തിലാണ് ബി.ജെ.പി.