വിദേശത്ത് എം.ബി.ബി.എസ് യോഗ്യത നേടിയ ഇന്ത്യക്കാര്‍ക്ക് ഇന്ത്യയില്‍ മെഡിക്കല്‍ കൗണ്‍സില്‍ (നാഷനല്‍ മെഡിക്കല്‍ കമ്മിഷന്‍ (www.nmc.org.in) രജിസ്‌ട്രേഷന്‍ നേടി പ്രാക്ടിസ് ചെയ്യുന്നതിനുള്ള എഫ്.എം.ജി.ഇ (Foreign Medical Graduate Examination) എന്ന സ്‌ക്രീനിങ് ടെസ്റ്റിന് ഏപ്രില്‍ 4 വരെ അപേക്ഷിക്കാം. ഒ.സി.ഐ വിഭാഗക്കാരും ഈ നിബന്ധന പാലിക്കണം. ഓസ്‌ട്രേലിയ, ന്യൂസീലന്‍ഡ്, കാനഡ, യു.കെ, യു.എസ്.എ എന്നീ രാജ്യങ്ങളില്‍ നിന്ന് മെഡിക്കല്‍ യോഗ്യത നേടിയവര്‍ ഈ പരീക്ഷ എഴുതേണ്ട.

വിദ്യാര്‍ഥി നേടിയ വിദേശ ബിരുദം ആ രാജ്യത്ത് മെഡിക്കല്‍ പ്രാക്ടിഷണറായി എന്റോള്‍ ചെയ്യാന്‍ വേണ്ട യോഗ്യതയായിരിക്കണം. ഇക്കാര്യത്തില്‍ അവിടത്തെ ഇന്ത്യന്‍ എംബസിയുടെ ഉറപ്പ് ലഭിച്ചിരിക്കുകയും വേണം. ഈ വര്‍ഷം ഏപ്രില്‍ 20നെങ്കിലും വിദേശ ബിരുദം നേടിയിരിക്കണം. ഈ തീയതിക്കകം പരീക്ഷാഫലം പ്രഖ്യാപിച്ചതിന്റെ രേഖയും ഹാജരാക്കണം. പ്രസക്തമായ കേസുകളില്‍ എലിജിബിലിറ്റി സര്‍ട്ടിഫിക്കറ്റും സമര്‍പ്പിക്കണം.

ജൂണ്‍ 4നു പരീക്ഷ നടത്തുമെന്ന് 'നാഷനല്‍ ബോര്‍ഡ് ഓഫ് എക്‌സാമിനേഷന്‍സ് ഇന്‍ മെഡിക്കല്‍ സയന്‍സസ്' (NBEMS) അറിയിച്ചിട്ടുണ്ട്. www.nbe.edu.in എന്ന സൈറ്റിലുടെ അപേക്ഷ സമര്‍പ്പിക്കാം. തിരുവനന്തപുരം, കൊല്ലം, കോട്ടയം, എറണാകുളം, തൃശൂര്‍, കോഴിക്കോട്, കണ്ണൂര്‍, കോയമ്പത്തൂര്‍, ബംഗളൂവുരു, ചെന്നൈ, മുംബൈ, ഡല്‍ഹി അടക്കം ദേശീയതലത്തില്‍ 50 പരീക്ഷാകേന്ദ്രങ്ങള്‍. അപേക്ഷാ ഫീസ് 7,080 രൂപ ഓണ്‍ലൈനായി അടയ്ക്കാം. രാവിലെയും ഉച്ച കഴിഞ്ഞുമായി 150 മിനിറ്റ് വീതമുള്ള 2 സെഷനുകളില്‍ കംപ്യൂട്ടര്‍ വഴി പരീക്ഷ നടത്തും. ഓരോന്നിലും 150 മള്‍ട്ടിപ്പിള്‍ ചോയിസ് ചോദ്യങ്ങള്‍. തെറ്റുത്തരത്തിനു നെഗറ്റീവ് മാര്‍ക്കില്ല. പരീക്ഷാഫലം ജൂണ്‍ 30നോടടുത്ത്. ആകെയുള്ള 300 മാര്‍ക്കില്‍ 150 എങ്കിലും നേടിയാല്‍ വിജയിക്കും. ഉത്തരങ്ങള്‍ പുനഃപരിശോധിക്കുകയോ വീണ്ടും കൂട്ടിനോക്കുകയോ ഇല്ല. മേയ് 20 മുതല്‍ പരിശീലനത്തിനുള്ള ഡെമോ ടെസ്റ്റ് വെബ്‌സൈറ്റിലുണ്ടായിരിക്കും. എത്ര തവണ വേണമെങ്കിലും പരീക്ഷയെഴുതാം. പക്ഷേ, വിജയശതമാനം പൊതുവേ കുറഞ്ഞ പരീക്ഷയായതിനാല്‍, കഴിയുന്നത്ര നന്നായി തയാറെടുത്ത് യോഗ്യത നേടുന്നതു പ്രധാനം. വിശദ വിവരങ്ങള്‍ക്ക്:www.nbe.edu.in