ബാസിത് ഹസൻ
തൊടുപുഴ
കെ.എസ്.ഇ.ബി ക്ക് കീഴിലുള്ള ഭൂകമ്പ നിരീക്ഷണ കേന്ദ്രങ്ങളുടെ നടത്തിപ്പ് സ്വകാര്യ മേഖലയ്ക്ക് വിടുന്നു. ഏറെ സാങ്കേതിക വൈദഗ്ധ്യത്തോടെയും പരിജ്ഞാനത്തോടെയും കൈകാര്യം ചെയ്യേണ്ട ജോലി സ്വകാര്യ ഏജൻസികൾ നിയോഗിക്കുന്ന തൊഴിലാളികൾക്ക് കൈമാറുന്നതോടെ ഭൂകമ്പ നിർണയം വഴിപാടായേക്കും. ഇടുക്കി ജലവൈദ്യുതി പദ്ധതിയ്ക്ക് കീഴിലുള്ള അഞ്ച് ഭൂകമ്പമാപിനി സ്റ്റേഷനുകളുടെ നടത്തിപ്പും അറ്റകുറ്റപ്പണികളും നിർവഹിക്കുന്നതിന് തൊഴിലാളികളെ ഏർപ്പെടുത്താൻ സ്വകാര്യ കരാറുകാരിൽ നിന്നും ടെൻഡർ ക്ഷണിച്ചു. ജോലിയിൽ ഏർപ്പെടുന്നവർക്ക് ബന്ധപ്പെട്ട മേഖലയിൽ അഞ്ചുവർഷത്തിൽ കുറയാത്ത പ്രവൃത്തിപരിചയം ഉണ്ടായിരിക്കണമെന്ന് പറയുന്നുണ്ടെങ്കിലും യോഗ്യത സംബന്ധിച്ച് അവ്യക്തതയുണ്ട്. ഇടുക്കി റിസർച്ച് ആന്റ് ഡാം സേഫ്റ്റി സബ് ഡിവിഷൻ അസി. എക്‌സി. എൻജിയറാണ് ടെൻഡർ ക്ഷണിച്ചിരിക്കുന്നത്.
ഇടുക്കി, കുളമാവ്, ആലടി, മീൻകട്ട്, ചോറ്റുപാറ, വള്ളക്കടവ് എന്നിവിടങ്ങളിൽ ഡിജിറ്റൽ ഭൂകമ്പമാപിനിയും കുളമാവ്, ഇടുക്കി, ആലടി എന്നിവിടങ്ങളിൽ അനലോഗ് ഭൂകമ്പമാപിനിയുമാണ് വാഴത്തോപ്പ് റിസർച്ച് സബ് ഡിവിഷന്റെ കീഴിലുള്ളത്. ഉപഗ്രഹ സംവിധാനത്തിലൂടെയാണ് ഡിജിറ്റൽ ഭൂകമ്പമാപിനികൾ വിവരങ്ങൾ കൈമാറുക. ചെറിയ ചലനംവരെ രേഖപ്പെടുത്തുന്ന ആധുനിക ശാസ്ത്ര സാങ്കേതിക വിദ്യയുടെ സഹായത്തോടെയാണ് ഡിജിറ്റൽ ഭൂകമ്പമാപിനി പ്രവർത്തിക്കുന്നത്. തിരുവനന്തപുരം, ഇടുക്കി എന്നിവിടങ്ങളിൽ സെൻട്രൽ റെക്കോർഡിങ് സ്‌റ്റേഷനുകൾ സ്ഥാപിച്ചിട്ടുണ്ട്. ഭൂചലനം റിപ്പോർട്ട് ചെയ്യുന്ന നിമിഷംതന്നെ വിവരം സെൻട്രൽ റെക്കോർഡിങ് സ്‌റ്റേഷനുകളിൽ ലഭിക്കും. തുടർന്ന് ഇതു ജില്ലാ ഭരണകൂടത്തിന് കൈമാറുന്ന രീതിയാണ് പിന്തുടരുന്നത്. ഡിജിറ്റൽ ഭൂകമ്പമാപിനിയിൽ നിന്ന് സൂക്ഷ്മമായ ഭൂകമ്പ വിവരങ്ങൾ ലഭിക്കുമ്പോൾ അനലോഗ് മിഷ്യനിൽ ഭൂകമ്പം രേഖപ്പെടുത്തുന്നതിന് പ്രത്യേകം തയ്യാറാക്കിയ പേപ്പറുകൾ ദിവസവും കറങ്ങിക്കൊണ്ടിരിക്കുന്ന മിഷ്യൻ ഡ്രമ്മിൽ വച്ച് കൊടുക്കേണ്ടി വരും.