ന്യൂഡല്‍ഹി: കൊവിഡ് വാക്‌സിനേഷന്‍ പ്രോത്സാഹിപ്പിക്കുന്നതിന് രാജ്യത്ത് പ്രധാനമന്ത്രി നരേന്ദ്രമോദി പ്രഖ്യാപിച്ച നാലുദിവസത്തെ 'ടിക്ക ഉത്സവ്' (വാക്‌സിനേഷന്‍ ഉത്സവം)പുറംമോടി മാത്രമാവുന്നു. വാക്‌സിനേഷന്‍ ഉത്സവത്തിന്റെ ഭാഗമായി വിവധ കേന്ദ്രങ്ങളില്‍ വാക്‌സിനേഷന്‍ ക്യാംപുകളും സംഘടിപ്പിക്കുന്നുണ്ട്. ഇന്നു മുതല്‍ 14 വരെയുള്ള നാല് ദിവസമാണ് 'വാക്‌സിന്‍ ഉത്സവം' ആയി ആചരിക്കുന്നത്.

എന്നാല്‍ വാക്‌സിന്റെ ക്ഷാമം കാരണം ഇത്തരം വാക്‌സിനേഷന്‍ ക്യാംപുകള്‍ നടത്താന്‍ കഴിയാതെ ബുദ്ധിമുട്ടുകയാണ് സംസ്ഥാനങ്ങള്‍. പല സംസ്ഥാനങ്ങളിലും അത്യാവശ്യഘട്ടങ്ങളില്‍ ഉപയോഗിക്കാനുള്ള വാക്‌സിന്‍ ഡോസുകള്‍ മാത്രമേ സ്‌റ്റോക്ക് ഉള്ളു.

മഹാരാഷ്ട്ര കൂടാതെ പഞ്ചാബ്, ഡല്‍ഹി, രാജസ്ഥാനങ്ങളിലും വാക്‌സിന്‍ ലഭ്യത കുറവാണ് എന്ന് കേന്ദ്രത്തെ അറിയിച്ചുകഴിഞ്ഞു. കേരളവും കൂടുതല്‍ വാക്‌സിന്‍ ആവശ്യപ്പെട്ടിട്ടുണ്ട്.പഞ്ചാബില്‍ ഇനി അഞ്ചുദിവസം കൂടി ഉപയോഗിക്കാനുള്ള വാക്‌സിനെ സ്‌റ്റോക്ക് ഉള്ളു എന്ന് മുഖ്യമന്ത്രി അമരീന്ദര്‍ സിങ് അറിയിച്ചു. അതിലും രൂക്ഷമാണ് രാജസ്ഥാനിലെ അവസ്ഥ. ഇവിടെ രണ്ടു ദിവസത്തേക്കുള്ള വാക്‌സിന്‍ മാത്രമേ സ്റ്റോക്കുള്ളു എന്നാണ് മുഖ്യമന്ത്രി അശോക് ഗെഹ് ലോട്ട് അറിയിച്ചിരിക്കുന്നത്. ഡല്‍ഹിയിലും വാക്‌സിന് കടുത്ത ക്ഷാമമാണ് അനുഭവപ്പെടുന്നത്. തലസ്ഥാന നഗരിയില്‍ 7 മുതല്‍ 10 ദിവസം വരെ നല്‍കാനുള്ള വാക്‌സിനെ സ്‌റ്റോക്ക് ഉള്ളുവെന്നാണ് മുഖ്യമന്ത്രി അരവിന്ദ് കെജ്‌രിവാള്‍ അറിയിച്ചിരിക്കുന്നത്. പലസംസ്ഥാനങ്ങളിലും വാക്‌സിന്‍ ക്ഷാമം കാരണം വാക്‌സിനേഷന്‍ ക്യാപുകള്‍ നിര്‍ത്തിവയ്‌ക്കേണ്ട അവസ്ഥയിലാണ്.

അതേസമയം ലോകത്തില്‍ ഏറ്റവും വേഗത്തില്‍ പ്രതിരോധ വാക്‌സിന്‍ വിതരണം ചെയ്യുന്ന രാജ്യമായി ഇന്ത്യമാറിയെന്നാണ് കേന്ദ്രസര്‍ക്കാരിന്റെ അവകാശ വാദം. 10 കോടി ഡോസുകളാണ് ഇന്ത്യ വിതരണം ചെയ്തത്. 85 ദിവസങ്ങള്‍ക്കുള്ളിലാണ് ഇന്ത്യ ഈ നേട്ടം കൈവരിച്ചത്.
കൊവിഡിനെതിരെയുള്ള പോരാട്ടം ഫലപ്രദമാകാന്‍ എല്ലാ ജനങ്ങളും സഹകരിക്കണമെന്നും ഓരോ വ്യക്തിയും സ്വയം വാക്‌സിനെടുക്കാന്‍ തയാറാവുന്നതിനൊപ്പം മറ്റൊരാളെ വാക്‌സിനെടുക്കാന്‍ സഹായിക്കണമെന്നും പ്രധാനമന്ത്രിമന്ത്രി പറഞ്ഞിരുന്നു. രാജ്യത്ത് വാക്‌സിന്‍ ക്ഷാമം അനുഭവപ്പെടുന്നതില്‍ പ്രധാനമന്ത്രിക്കെതിരേ രൂക്ഷ വിമര്‍ശനലുമായി കോണ്‍ഗ്രസ് അധ്യക്ഷ സോണിയാ ഗാന്ധി അടക്കമുള്ളവര്‍ രംഗത്തെത്തിയിരുന്നു.