അഹമ്മദാബാദ്: ന്യൂസീലന്‍ഡിനെതിരായ ട്വന്റി 20 പരമ്പരയിലെ മൂന്നാമത്തെയും അവസാനത്തെയും മത്സരത്തില്‍ ടോസ് നേടിയ ഇന്ത്യ ബാറ്റിങ് തിരഞ്ഞെടുത്തു. ഇന്ത്യന്‍ ടീമില്‍ യുസ്‌വേന്ദ്ര ചാഹലിന് പകരം ഉമ്രാന്‍ മാലിക്കിനെ ഉള്‍പ്പെടുത്തി. പൃഥ്വി ഷാ ഓപ്പണറായി തിരികെയെത്തിയേക്കുമെന്ന് കരുതപ്പെട്ടിരുന്നെങ്കിലും അതുണ്ടായില്ല. ന്യൂസീലന്‍ഡ് നിരയില്‍ ജേക്കബ് ഡഫിക്ക് പകരം ബെന്‍ ലിസ്റ്റര്‍ കളിക്കും.

കഴിഞ്ഞ 10 വര്‍ഷത്തിനിടെ 2 ടീമുകള്‍ മാത്രം കൈവരിച്ച നേട്ടത്തിന് ഒരു ജയം മാത്രം അകലെയാണ് ന്യൂസീലന്‍ഡ്. 2015ല്‍ ദക്ഷിണാഫ്രിക്കയും 2019ല്‍ ഓസ്‌ട്രേലിയയും മാത്രമാണ് 2012നു ശേഷം ഇന്ത്യന്‍ മണ്ണില്‍ പരമ്പര വിജയം നേടിയത്.

ന്യൂസീലന്‍ഡാവട്ടെ ഇതുവരെ ഇന്ത്യയില്‍ ഒരു ഫോര്‍മാറ്റില്‍ പോലും ഒന്നിലധികം മത്സരങ്ങളുള്ള പരമ്പര നേടിയിട്ടില്ല. അപൂര്‍വനേട്ടത്തിനായി ന്യൂസീലന്‍ഡ് ഇറങ്ങുമ്പോള്‍ നാട്ടിലെ ആധിപത്യം ഉറപ്പിക്കുന്നതിലാണ് ഇന്ത്യയുടെ നോട്ടം.