റിയാദ്: പ്രവാസികളുടെ താമസരേഖ (ഇഖാമ) പുതുക്കിയാല്‍ അതിന്റെ അച്ചടിച്ച പകര്‍പ്പ് കൈവശം വെക്കേണ്ടതില്ലെന്ന് ജനറല്‍ ഡയറക്ടറേറ്റ് ഓഫ് പാസ്‌പോര്‍ട്ട് (ജവാസാത്ത്) വ്യക്തമാക്കി. വിദേശ തൊഴിലാളികള്‍ക്കും അവരുടെ ആശ്രിതര്‍ക്കും ഇഖാമയുടെ ഹാര്‍ഡ് കോപ്പി കൈവശം വയ്ക്കുന്നതിന് പകരം സ്മാര്‍ട്ട് ഫോണിലെ ഡിജിറ്റല്‍ ഇഖാമ ഉപയോഗിക്കാമെന്നും പ്രിന്റ് എടുക്കാന്‍ ജവാസാത്ത് ഓഫിസ് സന്ദര്‍ശിക്കേണ്ടതില്ലെന്നും ജവാസാത്ത് അറിയിച്ചു.

മുഖീം ഐഡിയുടെ (റെസിഡന്റ് ഐഡന്റിറ്റി) സാധുത അത് ഇഷ്യൂ ചെയ്ത തീയതി മുതല്‍ അഞ്ച് വര്‍ഷമാണ്. എല്ലാ വര്‍ഷവും തൊഴിലുടമയുടെ അബ്ഷിര്‍ പ്ലാറ്റ്‌ഫോം വഴി ഇലക്ട്രോണിക് ആയി പുതുക്കിയാല്‍ മതി. കാലാവധി കഴിഞ്ഞ് മൂന്ന് ദിവസത്തിന് ശേഷം പുതുക്കുന്ന ഇഖാമയ്ക്ക് 500 റിയാല്‍ പിഴ ചുമത്തും. വീഴ്ച ആവര്‍ത്തിച്ചാല്‍ 1,000 റിയാലാണ് പിഴ.