റിയാദ്: ഇന്ത്യയിലെ ഉയർന്ന കൊവിഡ് വൈറസ് ബാധയിൽ ആശങ്ക പ്രകടിപ്പിച്ച് അറബ് മാധ്യമങ്ങളും. ഇന്ത്യയിലെ കൊവിഡ് കണക്കുകൾ വളരെ പ്രാധാന്യത്തോടെയാണ് വിവിധ പ്രമുഖ അറബ് മാധ്യമങ്ങൾ റിപ്പോർട്ട് ചെയ്യുന്നത്. പല മാധ്യമങ്ങളുടെയും ഒന്നാം പേജിൽ തന്നെ ഇന്ത്യയിലെ കൊവിഡ് പ്രതിസന്ധി വിളിച്ചോതുന്ന തരത്തിൽ ഇതിനകം തന്നെ ലോക്‌ഡോൺ ചിത്രങ്ങൾ സഹിതം വാർത്തകൾ പ്രസിദ്ധീകരിക്കുകയും ചെയ്തിട്ടുണ്ട്.

അൽ അറബിയ, സബ്ഖ്, സ്കൈന്യൂസ്, ബിബിസി അറബിക്, അൽ ജസീറ തുടങ്ങിയ അറബ് മാധ്യമങ്ങളും അറബ് രാഷ്ട്രങ്ങളിലെ ഇംഗ്ളീഷ് മാധ്യമങ്ങളും വളരെ ഗൗരവത്തോടെയാണ് ഇത് നോക്കി കാണുന്നത്. 24 മണിക്കൂറിനുള്ളിൽ 3,00,000 പുതിയ കൊവിഡ് കേസുകൾ റിപ്പോർട്ട് ചെയ്ത ഇന്ത്യ കൊവിഡ് മരണങ്ങൾ കൂടുതൽ റിപ്പോർട്ട് ചെയ്ത രാജ്യം കൂടിയാണ് എന്ന ശീർഷകത്തിലാണ് സഊദിയിലെ പ്രമുഖ ഓൺലൈൻ മാധ്യമമായ സബ്ഖ് ഇന്ത്യയിലെ സ്ഥിതി വിവരക്കണക്കുകൾ വിവരിച്ചത്. കൊവിഡ് രണ്ടാം തരംഗം ഉണ്ടാക്കിയ പ്രതിസന്ധി മെഡിക്കൽ രംഗത്തെ സൗകര്യങ്ങളുടെ അപര്യാപ്തതക്ക് ഹേതുവായെന്നും മരണസംഖ്യ കൂടാൻ അത് വഴിവെച്ചതായും വിലയിരുത്തുന്നു.

അറബ് രാജ്യങ്ങളടക്കം ലോകത്തിലെ വിവിധ രാജ്യങ്ങളിലേക്ക് വാക്‌സിൻ കയറ്റിഅയക്കുന്ന ഇന്ത്യയിലെ സ്ഥിഗതികൾ രൂക്ഷമായാൽ വാക്സിൻ കയറ്റുമതിയെയും ബാധിക്കുമെന്നും ആശങ്കയുണ്ട്. ലോകമെമ്പാടുമുള്ള 90 ലധികം വികസ്വര രാജ്യങ്ങൾക്ക് കൊവിഡ് വാക്സിനുകൾ നൽകുന്നതിൽ മുഖ്യ പങ്കുവഹിക്കുന്ന ഇന്ത്യയിലെ നിലവിലെ സാഹചര്യം വാക്സിൻ ഉൽപാദനത്തെ പോലും പ്രതികൂലമായി ബാധിക്കുമോ എന്ന ആശങ്കയും അറബ് പത്രം പങ്കുവെച്ചു.