ആലപ്പുഴ: കഴിഞ്ഞ ദിവസം മാരകായുധവുമായി പിടിയിലായ ആര്‍.എസ്.എസ് പ്രവര്‍ത്തകര്‍ എസ്.ഡി.പി.ഐ നേതാവിനെ വധിക്കാന്‍ ശ്രമിച്ചെന്ന് പൊലിസ്. ഇവര്‍ക്കെതിരെ പൊലിസ് കൊലപാതക ശ്രമത്തിന് കേസെടുത്തു. എസ്.ഡി.പി.ഐ ആലപ്പുഴ മണ്ഡലം വൈസ് പ്രസിഡന്റും മണ്ണഞ്ചേരി പഞ്ചായത്ത് അഞ്ചാം വാര്‍ഡ് മെമ്പറുമായ നവാസ് നൈനയെ വധിക്കാന്‍ ആര്‍.എസ്.എസ് പ്രവര്‍ത്തകര്‍ ശ്രമിച്ചുവെന്നാണ് പൊലിസ് എഫ്.ഐ.ആറില്‍ പറയുന്നത്. ഇവര്‍ നവാസിനെ വാള്‍ ഉപയോഗിച്ച് വെട്ടാന്‍ ശ്രമിക്കുകയായിരുന്നു.

സുമേഷ്, ശ്രീനാഥ് എന്നീ ആര്‍.എസ്.എസ് പ്രവര്‍ത്തകരെയാണ് കഴിഞ്ഞ ദിവസം പൊലിസ് കസ്റ്റഡിയിലെടുത്തത്. എസ്.ഡി.പി.ഐ സംസ്ഥാന സെക്രട്ടറി കെ.എസ്.ഷാന്‍ കൊല്ലപ്പെട്ട സ്ഥലത്തിനടുത്ത് നിന്നാണ് ഇവരെ പിടികൂടിയത്.

സംശയാസ്പദമായി രണ്ട്‌പേരെ കണ്ടതോടെ നാട്ടുകാര്‍ പൊലിസിനെ വിവരമറിയിക്കുകയായിരുന്നു. ഇവരില്‍ നിന്നും രണ്ട് വാളുകള്‍ പിടിച്ചെടുത്തിട്ടുണ്ട്. ഇരുവരേയും വിശദമായി ചോദ്യം ചെയ്യുമെന്ന് പൊലിസ് അറിയിച്ചിരുന്നു.