തൃശൂര്‍:പീച്ചിയില്‍ സി.ഐ.ടി.യു ചുമട്ട് തൊഴിലാളിയുടെ ആത്മഹത്യ ചെയ്ത സംഭവത്തില്‍ സി.പി.എം ബ്രാഞ്ച് സെക്രട്ടറിയെ മാറ്റി. ബ്രാഞ്ച് സെക്രട്ടറി ഗംഗാധരനെയാണ് മാറ്റിയത്. സി.ഐ.ടി.യു തൊഴിലാളി സജിയുടെ ആത്മഹത്യ കുറിപ്പില്‍ ഗംഗാധരനെതിരെ ആരോപണമുണ്ടായിരുന്നു. തുടര്‍ന്നാണ് നടപടിയെടുത്തത്. സി.പി.എം ബ്രാഞ്ച് സെക്രട്ടറിയും ലോക്കല്‍ കമ്മിറ്റി സെക്രട്ടറിയും ഭീഷണിപ്പെടുത്തിയിരുന്നുവെന്ന് ആത്മഹത്യാക്കുറിപ്പിലുണ്ടായിരുന്നു.

ഗംഗാധരന്‍ അഴിമതിക്കാരനാണെന്നും അദ്ദേഹത്തെ പുറത്താക്കണമെന്നും സജി നേരത്തെയും പരാതി നല്‍കിയിരുന്നു. ഇതിന്റെ പ്രതികാരമായി സജിയെ ഒറ്റപ്പെടുത്തുകയും ചെയ്തു. സി.ഐ.ടി.യുവുമായുള്ള അഭിപ്രായവ്യത്യാസത്തെ തുടര്‍ന്നാണ് സജി സ്വതന്ത്ര യൂണിയന്‍ രൂപീകരിച്ചത്. തുടര്‍ന്ന് പാര്‍ട്ടിയില്‍ നിന്ന് വലിയ തോതിലുള്ള വിമര്‍ശനമുണ്ടായി.

ഏപ്രില്‍ 10നായിരുന്നു സജി ആത്മഹത്യ ചെയ്തത്.പാര്‍ട്ടി പ്രവര്‍ത്തകരെ മൃതദേഹം കാണാനോ റീത്ത് വെയ്ക്കാനോ സജിയുടെ ബന്ധുക്കള്‍ അനുവദിച്ചിരുന്നില്ല.സജിയുടെ മരണത്തില്‍ അന്വേഷണം വേണമെന്നും ബന്ധുക്കള്‍ ആവശ്യപ്പെട്ടിരുന്നു.