ഗാന്ധിനഗര്‍: ഗുജറാത്തിലെ കൊവിഡ് മരണ നിരക്കില്‍ കൃത്രിമം നടക്കുന്നതായി ഗുജറാത്തിലെ പ്രാദേശിക മാധ്യമങ്ങള്‍. സര്‍ക്കാര്‍ മരണക്കണക്കുകള്‍ കുറച്ച് കാണിക്കുന്നതായി മാധ്യമങ്ങള്‍ റിപ്പോര്‍ട്ട് ചെയ്യുന്നു.

ഗുജറാത്തില്‍ 2021 മാര്‍ച്ച് മുതല്‍ മെയ് 10 വരെയുള്ള കൊവിഡ് മരണങ്ങളുടെ ഔദ്യോഗിക കണക്ക് 4218 ആണ്. എന്നാല്‍ 71 ദിവസത്തിനുള്ളില്‍ അപേക്ഷ നല്‍കിയ പ്രകാരം ഔദ്യോഗികമായി വിതരണം ചെയ്ത മരണ സര്‍ട്ടിഫിക്കറ്റുകളുടെ എണ്ണം 1.23 ലക്ഷമാണ്. ഔദ്യോഗിക കണക്കിനെക്കാള്‍ 65,085 എണ്ണത്തിന്റെ വര്‍ധനവാണ് ഉണ്ടായിരിക്കുന്നത്.

ഔദ്യോഗിക കണക്കിന്റെ 15 ഇരട്ടിയോളം കൊവിഡ് മരണങ്ങള്‍ വരെ ഗുജറാത്തില്‍ സംഭവിച്ചിരിക്കാമെന്നാണ് റിപ്പോര്‍ട്ട് വ്യക്തമാക്കുന്നത്.

2020 മാര്‍ച്ച് ഒന്നുമുതല്‍ മെയ് പത്തുവരെയുള്ള കാലയളവില്‍ രാജ്‌കോട്ട് നഗരത്തില്‍ 2,020 മരണ സര്‍ട്ടിഫിക്കറ്റുകള്‍ വാങ്ങിയതായാണ് രേഖകള്‍. 2021 മാര്‍ച്ച് ഒന്ന് മുതല്‍ മെയ് 10 വരെ 10,878 സര്‍ട്ടിഫിക്കറ്റുകളും സര്‍ക്കാര്‍ അനുവദിച്ച് വിതരണം ചെയ്തിട്ടുണ്ട്. എന്നാല്‍ ഈ കാലയളവില്‍ ആകെ 288 പേരേ കൊവിഡ് ബാധിച്ച് മരിച്ചിട്ടുള്ളൂവെന്നാണ് സര്‍ക്കാര്‍ പുറത്തുവിട്ട കണക്ക്.

അഹമ്മദാബാദ് നഗരത്തില്‍ 13,593 പേര്‍ക്കാണ് ഈ കാലയളവില്‍ മരണ സര്‍ട്ടിഫിക്കറ്റ് നല്‍കിയിരിക്കുന്നത്. എന്നാല്‍ ഈ കാലയളവില്‍ ഇവിടെ കൊവിഡ് ബാധിച്ച് മരിച്ചവരുടെ എണ്ണം സര്‍ക്കാര്‍ കണക്ക് പ്രകാരം 2,126 ആണ്.

സൂറത്ത് നഗരത്തില്‍ 2020 മാര്‍ച്ച് ഒന്നു മുതല്‍ മെയ് 10വരെയുള്ള കാലത്ത് 2,769 കൊവിഡ് സര്‍ട്ടിഫിക്കറ്റുകളാണ് നല്‍കിയിട്ടുള്ളത്. 2021ല്‍ ഇതേ കാലയളവില്‍ 8,851 മരണ സര്‍ട്ടിഫിക്കറ്റുകളുടെ വിതരണം ഇവിടെ നടന്നിരിക്കുന്നു.