തിരുവനന്തപുരം: പ്രതിപക്ഷ നേതാവിനെതിരായ പരാമര്‍ശത്തില്‍ മന്ത്രി മുഹമ്മദ് റിയാസിനെ രൂക്ഷമായി പരിഹസിച്ച് വി.ടി ബല്‍റാം. പ്രതിപക്ഷ നേതാവ് നട്ടെല്ല് ആര്‍.എസ്.എസിന് പണയം വെച്ചുവെന്നായിരുന്നു റിയാസിന്റെ വാക്കുകള്‍. ഇതിന് പിന്നാലെ കോണ്‍ഗ്രസ് നേതാക്കള്‍ രംഗതത്തെത്തിയിരുന്നു.

'സ്വപ്ന ആഴ്ചക്കാഴ്ചക്ക് വന്ന് സ്വന്തം ഭാര്യയേയും അമ്മായിഅച്ഛനേയും പഞ്ഞിക്കിടുമ്പോള്‍ അതിനോട് ക മാന്ന് ഒരക്ഷരം മറുപടി പറയാന്‍ ധൈര്യമില്ലാത്ത ഈ മൊയ്ന്താണ് കേരളത്തിലെ പ്രതിപക്ഷത്തിന്റെ നട്ടെല്ലിന്റെ ബലം പരിശോധിക്കാന്‍ വരുന്നത്.' എന്നായിരുന്നു വി.ടി ബല്‍റാമിന്റെ പരിഹാസം.

നിയമസഭയിലായിരുന്നു പ്രതിപക്ഷ നേതാവ് വി.ഡി സതീശനെതിരായ പരാമര്‍ശം. ബി.ജെ.പിക്കെതിരെ ശബ്ദം ഉയര്‍ത്താന്‍ അദ്ദേഹം തയ്യാറല്ലെന്നും പാചകവാതക വില വര്‍ധിച്ചപ്പോഴും കേന്ദ്ര ബജറ്റില്‍ സംസ്ഥാനത്തെ അവഗണിച്ച സാഹചര്യത്തിലും അദ്ദേഹം നിശബ്ദനായിരുന്നു. മറ്റ് കോണ്‍ഗ്രസ് എം.എല്‍.എമാരെ സംസാരിക്കാന്‍ അദ്ദേഹം അനുവദിച്ചില്ലെന്നും റിയാസ് വ്യക്തമാക്കി. മന്ത്രിമാരെ നിരന്തരമായി ആക്ഷേപിക്കുന്ന നിലപാടാണ് പ്രതിപക്ഷ നേതാവിന്റെത്. എന്നാല്‍ അദ്ദേഹത്തിന്റെ ഗുഡ് സര്‍ട്ടിഫിക്കറ്റ് തനിക്കാവശ്യമില്ലെന്നും റിയാസ് പറഞ്ഞു.

പ്രതിനിധാനം ചെയ്യുന്ന രാഷ്ട്രീയപാര്‍ട്ടിയെ ആക്ഷേപിച്ചാല്‍ നോക്കിനില്‍ക്കാനാവില്ല. മന്ത്രിസ്ഥാനം പാര്‍ട്ടി ഏല്‍പ്പിച്ച ചുമതലയാണ്. രാഷ്ട്രീയ ത്യാഗം എന്താണെന്ന് അദ്ദേഹത്തിന് അറിയില്ല. ബി.ജെ.പി. ആഗ്രഹിക്കുന്നപോലെ കേരള നിയമസഭയെ കൊണ്ടുപോകാനുള്ള ശ്രമത്തിലാണ് പ്രതിപക്ഷ നേതാവെന്നും മന്ത്രി പറഞ്ഞിരുന്നു.