തിരുവനന്തപുരം
ഈ മാസം എട്ടിന് തിരുവനന്തപുരത്ത് നിന്നും മൂകാംബിക സർവിസ് നടത്തിയ കെ.എസ്.ആർ.ടി.സി സ്വിഫ്റ്റ് ബസ് വഴി തെറ്റി അലഞ്ഞ് ഗോവയിലെത്തിയെന്ന പ്രചാരണം തെറ്റാണെന്ന് കെ.എസ്.ആർ.ടി.സി മാനേജ്മെൻ്റ്.
പ്രചാരണം തെറ്റാണെന്ന് കെ.എസ്.ആർ.ടി.സിയുടെ വിജിലൻസ് ഓഫിസറുടെ അന്വേഷണത്തിൽ കണ്ടെത്തി. പ്രചരിപ്പിക്കപ്പെടുന്ന പോലെ നിലവിൽ തിരുവനന്തപുരത്ത് നിന്നും മൂകാംബികയിലെക്ക് കെ.എസ്.ആർ.ടി.സി സ്വിഫ്റ്റ് സർവിസ് നടത്തുന്നില്ല. നിലവിൽ കെ.എസ്.ആർ.ടി.സി സ്വിഫ്റ്റിന്റെ എയർ ഡീലക്‌സ് ബസുകൾ എറണാകുളത്ത് നിന്നും, കൊട്ടാരക്കരയിൽ നിന്നുമാണ് കൊല്ലൂരിലേക്ക് സർവിസ് നടത്തുന്നത്. വാർത്തകൾ പ്രചരിച്ചതിന്റെ അടിസ്ഥാനത്തിൽ സി.എം.ഡി അന്വേഷണത്തിന് ഉത്തരവിട്ടിരുന്നു. ഇതിന്റെ അടിസ്ഥാനത്തിൽ വിജിലൻസ് ഓഫിസർ നടത്തിയ അന്വേഷണത്തിൽ മെയ് എട്ടിന് കൊട്ടരക്കരക്കയിൽ നിന്നുള്ള സർവിസിലേയും, എറണാകുളത്ത് നിന്നുള്ള സവിസിലേയും യാത്രക്കാരെ ഫോണിൽ വിളിച്ച് വിവരങ്ങൾ ശേഖരിച്ചു.
ബസ് റൂട്ട് മാറി സർവിസ് നടത്തിയില്ലെന്നും, യാത്ര സുഖകരമാണെന്നുമാണ് യാത്രക്കാർ അറിയിച്ചത്. സർവിസുകളിൽ ട്രെയിനിങ് നൽകുന്നതിന് ചുമതലയുണ്ടായിരുന്ന ഇൻസ്‌പെക്ടർമാരും ബസ് വഴിമാറി സഞ്ചരിച്ചിട്ടില്ലെന്ന റിപ്പോർട്ടാണ് നൽകിയത്.
കൂടാതെ ബസുകളുടെ 7,8,9,10 തീയതികളിലെ ലോഗ് ഷീറ്റ് പരിശോധിച്ചപ്പോഴും സ്ഥിരം ഓടുന്ന ദൂരം മാത്രമേ ബസുകൾ സർവിസ് നടത്തിയിട്ടുള്ളൂവെന്നും കണ്ടെത്തി. തുടർന്നാണ് ലഭ്യമായ രേഖകളുടേയും മൊഴികളുടേയും അടിസ്ഥാനത്തിൽ പ്രചാരണം തെറ്റാണെന്ന റിപ്പോർട്ട് വിജിലൻസ് നൽകിയത്.യാതൊരു അടിസ്ഥാനവുമില്ലാതെ കെ.എസ്.ആർ.ടി.സി സ്വിഫ്റ്റിനെതിരേ വരുന്ന വാർത്തയുടെ ഭാഗമായി ഇതിനെ കണ്ടാൽ മതിയെന്നും മാനേജ്‌മെന്റ് അറിയിച്ചു.