ദുബൈ: നീറ്റിന്റെ തിളക്കത്തില്‍ മലയാളി യുവ ഡോക്ടര്‍. ഓള്‍ ഇന്ത്യ നീറ്റ് പി.ജി പരീക്ഷയിലെ എം.ഡി.എസ് വിഭാഗത്തിലാണ് കാസര്‍ക്കോട് സ്വദേശിയായ സഅദയ്ക്ക് തിളക്കമാര്‍ന്ന വിജയം നേടാനായത്.ഷാര്‍ജയില്‍ താമസിക്കുന്ന ഡോ. സഅദ സുലൈമാനാണ് രണ്ടാം റാങ്ക് നേടി ഏവര്‍ക്കും അഭിമാനമായത്.

എയിംസ് എന്‍ട്രന്‍സില്‍ മുപ്പത്തിയഞ്ചാം റാങ്കും സഅദക്കാണ്. നീറ്റിലെ രണ്ടാം റാങ്കിന് പുറമെ എയിംസ് ഒ.ബി.സി വിഭാഗത്തിലെ പത്താം റാങ്കും ഈ യുവതിക്കുണ്ട്. കാസര്‍കോട് തൃക്കരിപ്പൂര്‍ സ്വദേശിയായ സഅദ 2018ല്‍ പരിയാരം മെഡിക്കല്‍ കോളജില്‍ നിന്നാണ് ബി.ഡി.എസ് പൂര്‍ത്തിയാക്കിയത്. നേരത്തെ ദുബൈയിലായിരുന്ന ഇവര്‍ കഴിഞ്ഞ വര്‍ഷം പഠനത്തിനായി നാട്ടില്‍ പോയിരുന്നു. പരീക്ഷക്ക് ശേഷം വീണ്ടും ദുബൈയില്‍ ഭര്‍ത്താവ് അഹമ്മദലിയുടെ അടുക്കലേക്ക് മടങ്ങിയെത്തിയപ്പോഴാണ് നീറ്റ് റാങ്കിന് അര്‍ഹയായ വിവരമറിയുന്നത്. വി.പി.എം സുലൈമാന്‍ റാബിയ ദമ്പതികളുടെ മകളാണ് സഅദ. രണ്ടര വയസുള്ള അര്‍വ മകളാണ്.