ലഖ്‌നോ: ഉത്തര്‍പ്രദേശിലെ ലഖിംപൂര്‍ ഖേരിയില്‍ ഭാരതീയ കിസാന്‍ യൂണിയന്‍ (ബി.കെ.യു) നേതാവിന് നേരെ വധശ്രമം. കാര്‍ഷിക നിയമങ്ങള്‍ക്കെതിരായ പ്രക്ഷോഭത്തിന് നേതൃത്വം നല്‍കിയ ബി.കെ.യുവിന്റെ ലഖിംപൂര്‍ ഖേരി ജില്ല പ്രസിഡന്റ് ദില്‍ബാഗ് സിങിന് നേരയൊണ് ആക്രമണമുണ്ടായത്. ബൈക്കിലെത്തിയ രണ്ട് അജ്ഞാതര്‍ ദില്‍ബാഗ് സിങിന്റെ കാറിന് നേരെ വെടിയുതിര്‍ക്കുകയായിരുന്നു. ആക്രമണത്തില്‍ നിന്ന് അദ്ദേഹം അദ്ഭുതകരമായി രക്ഷപ്പെട്ടു. ചൊവ്വാഴ്ച വൈകിട്ടാണ് സംഭവം.

സംഭവത്തില്‍ കേസെടുത്തതായി അഡീഷണല്‍ പൊലിസ് സൂപ്രണ്ട് അരുണ്‍ കുമാര്‍ സിങ് പറഞ്ഞു. ആക്രമണത്തിന് ശേഷം സ്ഥലം പൊലിസ് സന്ദര്‍ശിക്കുകയും ദില്‍ബാഗ് സിങിന്റെ മൊഴി രേഖപ്പെടുത്തുകയും ചെയ്തു. അക്രമിക്കപ്പെട്ട കാറും സംഭവ സ്ഥലവും ഫോറന്‍സിക് സംഘം പരിശോധിക്കുന്നുണ്ട്. അക്രമികളെ കണ്ടെത്താനുള്ള ശ്രമവും അന്വേഷണവും തുടരുകയാണെന്ന് അദ്ദേഹം അറിയിച്ചു.

മകന് അസുഖമായതിനാല്‍ തന്റെ സുരക്ഷ ഉദ്യോഗസ്ഥന്‍ അവധിയിലായിരുന്നുവെന്ന് ദില്‍ബാഗ് സിങ് പറഞ്ഞു. കാറിന് നേരെ അക്രമികള്‍ വെടിയുതിര്‍ത്തു. മൂന്ന് ബുള്ളറ്റുകള്‍ കാറില്‍ പതിച്ചതായും അക്രമികള്‍ വാതില്‍ തുറക്കാന്‍ ശ്രമിച്ചതായും അദ്ദേഹം പറഞ്ഞു. വാഹനത്തിന്റെ ടയറുകളിലൊന്ന് വെടിവെപ്പില്‍ പഞ്ചറായി.

2021 ഒക്‌ടോബര്‍ മൂന്നിനാണ് ലഖിംപൂര്‍ ഖേരിയില്‍ കര്‍ഷക കൂട്ടക്കൊല നടന്നത്. കേന്ദ്ര സഹമന്ത്രി അജയ് കുമാര്‍ മിശ്രയുടെ മകന്‍ ആശിഷ് മിശ്ര കേസിലെ മുഖ്യപ്രതിയാണ്. കര്‍ഷക നിയമങ്ങള്‍ക്കെതിരായ പ്രതിഷേധത്തിനിടെ ആശിഷ് മിശ്രയുടെ കാര്‍ നാല് കര്‍ഷകരുടെയും ഒരു മാധ്യമ പ്രവര്‍ത്തകന്റെയും മുകളിലൂടെ പാഞ്ഞുകയറി. അഞ്ച് പേരും ദാരുണമായി കൊല്ലപ്പെട്ടു. തുടര്‍ന്നുണ്ടായ അക്രമത്തില്‍ കാറിന്റെ ഡ്രൈവറും രണ്ട് ബി.ജെ.പി പ്രവര്‍ത്തകരുമടക്കം മൂന്ന് പേര്‍ മരിച്ചു. കര്‍ഷകരുടെ മരണവുമായി ബന്ധപ്പെട്ട് ഒക്ടോബര്‍ ഒമ്പതിനാണ് മിശ്രയെ അറസ്റ്റ് ചെയ്തത്.