ശ്രീനഗര്‍: കശ്മീരില്‍ അതിഥി തൊഴിലാളിയെ വെടിവെച്ചു കൊന്നു. കുല്‍ഗാമില്‍ ബാങ്ക് മാനേജറെ കൊലപ്പെടുത്തി മണിക്കൂറുകള്‍ക്കകമാണ് വീണ്ടും ആക്രമണം ഉണ്ടായിരിക്കുന്നത്. സംഭവത്തില്‍ മറ്റൊരു തൊഴിലാളിക്കും പരിക്കേറ്റിട്ടുണ്ട്. ഇയാളെ ആശുപത്രിയില്‍ പ്രവേശിപ്പിച്ചിട്ടുണ്ട്.

കശ്മീരിലെ മാഗ്രപോരയിലെ ഛഡൂര മേഖലയിലെ ഇഷ്ടികകളത്തില്‍ ജോലി ചെയ്തിരുന്നവര്‍ക്കു നേരെ തീവ്രവാദികള്‍ വെടിയുതിര്‍ക്കുകയായിരുന്നു. ബിഹാര്‍ സ്വദേശിയായ ദില്‍കുഷ് കുമാറാണ് മരിച്ചതെന്ന് പൊലിസ് പറഞ്ഞു.

കഴിഞ്ഞ ദിവസം സ്‌കൂള്‍ ടീച്ചറായ ജമ്മു സാംബ സെക്ടര്‍ സ്വദേശിനി രജ്‌നി ബാല വെടിയേറ്റ് മരിച്ചിരുന്നു. പ്രദേശത്ത് നിരന്തരം അനിഷ്ടസംഭവങ്ങള്‍ വര്‍ധിച്ചതോടെ ഒരു വിഭാഗം ആളുകള്‍ പ്രതിഷേധവുമായി രംഗത്ത് എത്തിയിരുന്നു. സംഭവത്തിന്റെ ഗൗരവം കണക്കിലെടുത്ത് അമിത്ഷാ യോഗം വിളിക്കുകയും ചെയ്തിരുന്നു.