തലപ്പുഴ: തീവ്രവാദ, ഛിദ്രശക്തികള്‍ മഹല്ലുകളില്‍ നുഴഞ്ഞ് കയറുന്നതിനെതിരേ കരുതിയിരിക്കുവാനും മഹല്ലുകളില്‍ അനൈക്യവും അസഹിഷ്ണുതയും ഉണ്ടാക്കി ആരാധനാലയങ്ങളും ദീനി സ്ഥാപനങ്ങളും അടച്ചുപൂട്ടിക്കുന്നവരെയും ഒറ്റപ്പെടുത്താനും സമൂഹത്തിന് മുന്നില്‍ തുറന്ന് കാട്ടാനും മഹല്ല് കമ്മിറ്റികള്‍ ഉണര്‍ന്ന് പ്രവര്‍ത്തിക്കണമെന്നും എസ്.എം.എഫ് തലപ്പുഴ മേഖലാ സാരഥി സംഗമം ആവശ്യപ്പെട്ടു.
 ജില്ലയിലെ 14 മേഖലകളിലും സംഘടിപ്പിക്കുന്ന സാരഥി സംഗമത്തിന്റെ ജില്ലാതല ഉദ്ഘാടനം തലപ്പുഴ ചുങ്കം മദ്‌റസയില്‍ നടന്നു. പരിപാടി സമസ്ത ജില്ലാ ട്രഷറര്‍ ഇബ്‌റാഹിം ഫൈസി വാളാട് ഉദ്ഘാടനം ചെയ്തു. നിസാര്‍ ദാരിമി അധ്യക്ഷനായി.
പിണങ്ങോട് അബൂബക്കര്‍, ഉസ്മാന്‍ കാഞ്ഞായി ക്ലാസുകള്‍ നയിച്ചു. ടി.സി അലി മുസ്‌ലിയാര്‍, കെ.എം ആലി, പി.സി ഇബ്‌റാഹിം ഹാജി കമ്പളക്കാട്, കെ.കെ.എം ഹനീഫല്‍ ഫൈസി സംസാരിച്ചു. ശിഹാബുദ്ധീന്‍ ഇമ്പിച്ചിക്കോയ തങ്ങള്‍ ദുആ മജ്‌ലിസിന് നേതൃത്വം നല്‍കി.
എടപ്പാറ കുഞ്ഞമ്മദ് സ്വാഗതവും എം അബ്ദുറഹ്മാന്‍ നന്ദിയും പറഞ്ഞു. സമസ്തയുടെ പ്രവര്‍ത്തനങ്ങള്‍ക്ക് കൂടുതല്‍ കരുത്ത് പകരാനും വഖഫ് സ്വത്തുക്കളുടെ സംരക്ഷണത്തിന് വഖഫ് ബോര്‍ഡുമായി സഹകരിച്ച് പ്രവര്‍ത്തിക്കാനും മഹല്ല് ജമാഅത്തുകള്‍ തയ്യാറാവണമെന്നും സംഗമം ആവശ്യപ്പെട്ടു.