പുതുക്കാട്(തൃശൂര്‍)ഓണ്‍ലൈന്‍ ക്ലാസില്‍ പങ്കെടുക്കാനായി കാട് കയറുകയാണ് പുതുക്കാട് മണ്ഡലത്തിലെ പാലപ്പിള്ളി കുണ്ടായിയിലെ വിദ്യാര്‍ഥികള്‍.

തോട്ടം തൊഴിലാളികളുടെ മക്കളും, ചക്കിപ്പറമ്പ് ആദിവാസി കോളനിയിലെ കുട്ടികളും ഉള്‍പ്പടെ 60 കുട്ടികളാണ് മൊബൈലിന് റേഞ്ച് ഇല്ലാത്തതുമൂലം ദുരിതമനുഭവിക്കുന്നത്. ഓണ്‍ലൈന്‍ ക്ലാസ് ആരംഭിച്ചതോടെ മക്കളുടെ പഠനം മുടങ്ങുമെന്ന ആശങ്കയിലായിരുന്നു മാതാപിതാക്കള്‍. ഒടുവില്‍ രണ്ട് കിലോമീറ്റര്‍ അകലെയുള്ള പാറക്കുന്നിലാണ് ഇവര്‍ റേഞ്ച് കണ്ടെത്തിയത്. ഒന്നാം ക്ലാസ് മുതല്‍ ഉന്നത വിദ്യാഭ്യാസം തേടുന്ന വിദ്യാര്‍ഥികള്‍ വരെയുണ്ട് ഇവിടെ. പഠനം മുടങ്ങാതിരിക്കണമെങ്കില്‍ ഈ മലമുകളിലെത്തണം. റബ്ബര്‍ എസ്റ്റേറ്റുകള്‍ കടന്ന് വേണം റേഞ്ചുള്ള പാറക്കുന്നിലെത്താന്‍. പല സമയങ്ങളില്‍ ക്ലാസുകള്‍ നടക്കുന്നതുമൂലം എപ്പോഴും പാറക്കുന്നില്‍ കുട്ടികളെ കാണാം. വന്യമൃഗശല്യം രൂക്ഷമായ പ്രദേശത്ത് കുട്ടികളെ ഒറ്റക്ക് വിടാന്‍ ഭയമുള്ളതുമൂലം ജോലി ഉപേക്ഷിച്ച് കൂടെ പോകുകയാണ് മാതാപിതാക്കള്‍.