മാനന്തവാടി: ഔദ്യോഗിക വേഷത്തില്‍ ക്ഷേത്രക്കമ്മിറ്റി ഓഫിസിലെത്തി രക്ഷാ ബന്ധന്‍ ചടങ്ങില്‍ പങ്കെടുത്ത എസ്.ഐക്കെതിരേ സ്‌പെഷ്യല്‍ ബ്രാഞ്ച് പൊലിസ് മേധാവിക്ക് റിപ്പോര്‍ട്ട് നല്‍കിയതായി സൂചന. മാനന്തവാടി എസ്.ഐ വിനോദ് വലിയാറ്റൂരിനെതിരേയാണ് സ്‌പെഷ്യല്‍ ബ്രാഞ്ച് അന്വേഷണ റിപ്പോര്‍ട്ട് നല്‍കിയത്.
കഴിഞ്ഞ ദിവസം നഗരത്തിലെ ഒരു ക്ഷേത്രത്തില്‍ വെച്ച് നടന്ന ചടങ്ങിലാണ് എസ്.ഐ രാഖി കെട്ടിയത്. രാഖി കെട്ടുന്ന ഫോട്ടോ പിന്നീട് സോഷ്യല്‍ മീഡിയ വഴി വ്യാപകമായി പ്രചരിക്കുകയും ചെയ്തു.
സംഘ്പരിവാറുമായി ബന്ധപ്പെട്ട് പ്രവര്‍ത്തിക്കുന്നവരാണ് ഫോട്ടോയില്‍ എസ്.ഐയുടെ അടുത്ത് നില്‍ക്കുന്നത്. യൂനിഫോമണിഞ്ഞ് മത ചടങ്ങുകളില്‍ പങ്കെടുക്കുന്നതിന് പൊലിസികാര്‍ക്ക് വിലക്കുണ്ട്. ഇത് പരിഗണിക്കാതെയാണ് ഇയാള്‍ പരിപാടിയില്‍ പങ്കെടുത്തത്. സോഷ്യല്‍ മീഡിയ വഴി പ്രചരിച്ച ഫോട്ടോയുടെ അടിസ്ഥാനത്തില്‍ നടത്തിയ റിപ്പോര്‍ട്ടാണ് സ്‌പെഷ്യല്‍ ബ്രാഞ്ച് ഡിവൈ.എസ്.പി മുഖേന ജില്ലാ പൊലിസ് മേധാവിക്ക് നല്‍കിയിരിക്കുന്നത്.