കണ്ണൂര്‍:  വൃക്കരോഗ നിയന്ത്രണം ലക്ഷ്യമിട്ടുകൊണ്ട് മൊബൈല്‍ ഡയാലിസിസ് യൂനിറ്റുമായി കണ്ണൂര്‍ വൃക്കരോഗ നിര്‍ണയ സമിതി. ഗ്രാമതലത്തില്‍ നേരിട്ടെത്തി ക്യാംപുകള്‍ നടത്തിയാണ് രോഗനിര്‍ണയം നടത്തുക. രക്തപരിശോധനയും മൂത്രപരിശോധനയും നടത്തി വൃക്കരോഗം, പ്രമേഹം, ഉയര്‍ന്ന രക്തസമ്മര്‍ദം, ബോഡി മാസ് ഇന്‍ഡക്‌സ് എന്നിവ കണ്ടെത്തി ചികിത്സാ നിര്‍ദേശങ്ങള്‍ നല്‍കും. ഒരു ഡോക്ടറും മൂന്ന് ലാബ് ടെക്‌നീഷ്യന്‍മാരും യൂനിറ്റിലുണ്ടാകും. വിവിധ സാമൂഹ്യ സന്നദ്ധ സംഘടനകള്‍ക്കും ഗ്രാമപഞ്ചായത്തുകള്‍ക്കും 11,000 രൂപ ഫീസ് അടച്ച് ക്യാംപുകള്‍ സംഘടിപ്പിക്കാം.
പദ്ധതിയുടെ ഉദ്ഘാടനം ഇന്നു വൈകുന്നേരം മൂന്നിന് ചേംബര്‍ഹാളില്‍ കണ്ണൂര്‍ റെയ്ഞ്ച് ഐ.ജി ദിനേന്ദ്രകശ്യപ് നിര്‍വഹിക്കും. മൊബൈല്‍ ലബോറട്ടറിയുടെ ഉദ്ഘാടനം ജില്ലാ പഞ്ചായത്ത് പ്രസിഡന്റ് കെ.വി സുമേഷ് നിര്‍വഹിക്കും. മൊബൈല്‍ യൂനിറ്റിലെ സാങ്കേതിക വിദഗ്ധര്‍ക്കുള്ള പരിശീലനത്തിനു ശേഷം സെപ്തംബര്‍ 10നു ശേഷമായിരിക്കും ക്യാംപുകള്‍ നടക്കുക. ഫോണ്‍ 9447096281, 2705309, 2703309. വാര്‍ത്താസമ്മേളനത്തില്‍ ചെയര്‍മാന്‍ സി കൃഷ്ണനാഥ പൈ, കണ്‍വീനര്‍ ടി.കെ രമേഷ്‌കുമാര്‍, സിജു വര്‍ഗീസ്, വൈസ് ചെയര്‍മാന്‍ സുശീല്‍ ആറോണ്‍ പങ്കെടുത്തു.