ന്യൂഡല്‍ഹി: ജമ്മു കശ്മീരിലെ വിവിധ പാര്‍ട്ടി നേതാക്കളുമായി പ്രധാനമന്ത്രി നരേന്ദ്ര മോദി നടത്തിയ കൂടിക്കാഴ്ച അവസാനിച്ചിരുന്നു. പ്രമുഖ പാര്‍ട്ടികളുടെ 14 നേതാക്കളുമായാണ് മോദിയും ആഭ്യന്തര മന്ത്രി അമിത്ഷായും കൂടിക്കാഴ്ച നടത്തിയത്. മൂന്നു മണിക്ക് തുടങ്ങിയ യോഗം ഏഴു മണിയോടെയാണ് അവസാനിച്ചത്.

2019 ഓഗസ്റ്റ് അഞ്ചിന് ജമ്മു കശ്മീരിന്റെ പ്രത്യേക പദവിയും സംസ്ഥാന പദവിയും എടുത്തുകളഞ്ഞ ശേഷമുള്ള ആദ്യ ഉന്നതതല യോഗമാണ് ഇന്ന് നടന്നത്.

ജമ്മു കശ്മീരിലെ നേതാക്കളുടെ അഭിപ്രായം ആരായുകയാണ് പ്രധാനമായും യോഗത്തിലുണ്ടായത്. യോഗത്തില്‍ സംതൃപ്തരാണെന്ന് നേതാക്കള്‍ പിന്നീട് പ്രതികരിച്ചു. എല്ലാവരും പ്രധാനമായി ആവശ്യപ്പെട്ട് സംസ്ഥാന പദവി പുന:സ്ഥാപിക്കണമെന്നാണ്. എന്നാല്‍ ആദ്യം അതിരുകള്‍ നിര്‍ണയിച്ച് തെരഞ്ഞെടുപ്പിലേക്ക് കടക്കുകയാണ് ചെയ്യുകയെന്നും സംസ്ഥാന പദവിയുടെ കാര്യത്തില്‍ പിന്നീട് തീരുമാനമുണ്ടാവുമെന്നുമാണ് സര്‍ക്കാരിന്റെ ഭാഗത്തുനിന്നുണ്ടായ മറുപടി.

ജമ്മു കശ്മീരിന് സംസ്ഥാന പദവി നല്‍കുന്നതിന് സര്‍ക്കാര്‍ പ്രതിജ്ഞാബദ്ധമാണെന്ന് അമിത്ഷാ അറിയിച്ചതായി യോഗത്തില്‍ സംബന്ധിച്ച കോണ്‍ഗ്രസ് നേതാവ് ഗുലാം നബി ആസാദ് പറഞ്ഞു.