വിദേശത്ത് നിന്ന് ലഹരി ഉപയോഗിക്കാമെന്ന് കരുതേണ്ട; യുഎഇയിൽ എത്തുമ്പോൾ പിടിക്കപ്പെടും

ഷാർജ: വിദേശത്ത് വെച്ച് ലഹരി മരുന്ന് ഉപയോഗിക്കുന്നവർക്ക് യുഎഇയുടെ മുന്നറിയിപ്പ്. ലഹരി ഉപയോഗിച്ച ശേഷം യുഎഇയിലേക്ക് തിരിച്ചെത്തുമ്പോൾ പിടികൂടാൻ മടിക്കില്ലെന്ന് യുഎഇ യുഎഇ ഡ്രഗ് കൺട്രോൾ കൗൺസിൽ മേധാവി അറിയിച്ചു. യുഎഇ നിവാസികൾക്കാണ് മുന്നറിയിപ്പ് നൽകിയത്. ലഹരിമരുന്ന് ഉപയോഗം ചില രാജ്യങ്ങളിൽ അനുവദിക്കുന്നെണ്ടെങ്കിലും യുഎഇയിൽ നിയമവിരുദ്ധമാണ്.

യുഎഇ നിവാസികൾ വിദേശ രാജ്യങ്ങൾ സന്ദർശിക്കുമ്പോൾ ലഹരി ഉപയോഗിക്കുന്നുണ്ടോ എന്ന് നിരീക്ഷിക്കും. വിദേശ രാജ്യങ്ങളിൽ ലഹരിമരുന്ന് ഉപയോഗിക്കുന്ന പാർട്ടികളിലും കഫേകളിലും മറ്റും ഇടയ്ക്കിടെ ഉണ്ടാകുന്ന അപകടങ്ങൾ ചൂണ്ടിക്കാട്ടിയാണ് മുന്നറിയിപ്പ് നൽകിയത്. ലഹരി ഉപയോഗത്തിൽ നിന്ന് യുവാക്കളെ തടയുകയാണ് ലക്ഷ്യം. ദുബായ് പൊലീസ് ആൻഡ് പബ്ലിക് സെക്യൂരിറ്റി ഉപമേധാവിയും യുഎഇ ഡ്രഗ് കൺട്രോൾ കൗൺസിൽ ചെയർമാനുമായ ലഫ്റ്റനന്റ് ജനറൽ ദാഹി ഖൽഫാൻ തമീം ആണ് മുന്നറിയിപ്പ് നൽകിയത്.

വിദേശത്ത് വെച്ച് ലഹരി ഉപയോഗിച്ചതായി കണ്ടെത്തിയാൽ യുഎഇയിലേക്കു തിരിച്ചെത്തുമ്പോൾ അറസ്റ്റ് ചെയ്യാൻ മടിക്കില്ലെന്നും അദ്ദേഹം പറഞ്ഞു. ഷാർജയിൽ ഡ്രഗ് പ്രിവൻഷൻ ഫോറം ഉദ്ഘാടനം ചെയ്യുകയായിരുന്നു അദ്ദേഹം. ലഹരിമരുന്ന് ചെറുക്കാനുള്ള ശ്രമങ്ങൾ ഏകീകരിക്കണമെന്നു പറഞ്ഞ അദ്ദേഹം യജ്ഞത്തിൽ പങ്കാളികളാകാൻ മാതാപിതാക്കളോടും യുവാക്കളോടും അഭ്യർഥിച്ചു.