കല്‍പ്പറ്റ: ഇരുചക്ര വാഹനങ്ങളും ഓട്ടോറിക്ഷകളും ഒഴികെയുള്ള എല്ലാ വാഹനങ്ങള്‍ക്കു വേഗപ്പൂട്ട് ഘടിപ്പിക്കണമെന്ന ട്രാന്‍സ്‌പോര്‍ട്ട് കമ്മിഷണറുടെ ഉത്തരവിനെതിരേ സംയുക്ത മോട്ടോര്‍ വാഹന തൊഴിലാളി കോഡിനേഷന്‍ കമ്മിറ്റി മാര്‍ച്ചും ധര്‍ണയും നടത്തി.
സുപ്രീം കോടതി വിധിയുടെ പേരു പറഞ്ഞാണ് കേരളത്തില്‍ മാത്രമായി എല്ലാ വാഹനങ്ങള്‍ക്കും വേഗപ്പൂട്ട് നിര്‍ബന്ധമാക്കുന്നത്. ബസുകള്‍ക്കും ട്രക്കുകള്‍ക്കും നേരത്തെ തന്നെ ഗേവപ്പൂട്ട് ഘടിപ്പിക്കാന്‍ തീരുമാനിച്ചിരുന്നെങ്കിലും മറ്റു സംസ്ഥാനങ്ങള്‍ കോടതിയെ സമീപിച്ചതോടെ ഇതില്‍ നിന്ന് ഒഴിവാക്കിയിരുന്നു. പുതിയ ഉത്തരവും കേരളത്തില്‍ മാത്രമാണ് നടപ്പാക്കുന്നത്.
 ഒന്നോ, രണ്ടോ കമ്പനികളുടെ വേഗപ്പൂട്ട മാത്രമാണ് കേരളത്തില്‍ ലഭ്യമായിട്ടുള്ളത്. അവയുടെ തുടര്‍ സേവനവും തൃപ്തികരമല്ല. ഈ സാഹചര്യത്തില്‍ കേരളത്തില്‍ മാത്രമായി നടപ്പാക്കുന്ന ഈ പരിഷ്‌കാരം റദ്ദ് ചെയ്യണമെന്ന് കോഡിനേഷന്‍ കമ്മിറ്റി ആവശ്യപ്പെട്ടു. സമരം പി.ആര്‍ ജയപ്രകാശ് ഉദ്ഘാടനം ചെയ്തു.
കെ. സുഗതന്‍, ഇ.ജെ ബാബു, ടി.കെ റെജി, പി.കെ അച്ചുതന്‍, ഗിരീഷ് കല്‍പ്പറ്റ സംസാരിച്ചു. അനീഷ് ബി.നായര്‍, റഷീദ് പടയന്‍, കെ.എം വര്‍ഗീസ്, എന്‍. മുസ്തഫ, കെ.എന്‍ കൃഷ്ണന്‍, കെ.ടി സുമേഷ്, പി.എം സന്തോഷ് കുമാര്‍, എന്‍.വി രതീഷ്, രാമചന്ദ്രന്‍, എ.വി ജയന്‍ നേതൃത്വം നല്‍കി.