കാന്റെ സഊദി ക്ലബില്‍; വൈദ്യ പരിശോധന പൂര്‍ത്തിയായി

റിയാദ്: ഫ്രഞ്ച് സ്‌ട്രൈക്കര്‍ കരിം ബെന്‍സെമയെ സ്വന്തമാക്കിയതിനു പിന്നാലെ ചെല്‍സി ക്ലബിന്റെ മിഡ്ഫീല്‍ഡര്‍ എന്‍ഗോളോ കാന്റെയെയും സ്വന്തമാക്കി സഊദി പ്രോ ലീഗ് ക്ലബ് അല്‍ ഇത്തിഹാദ്. കാന്റെയുടെ വൈദ്യ പരിശോധന പൂര്‍ത്തിയായെന്നാണു സഊദി അറേബ്യന്‍ ക്ലബ് നല്‍കുന്ന സൂചന. രണ്ടു വര്‍ഷത്തെ കരാറിലാണ് ഫ്രഞ്ച് ദേശീയ താരം സഊദി അറേബ്യയിലേക്കു കൂടുമാറുന്നത്. ഏകദേശം 880 കോടി രൂപയാണ് കാന്റെയ്ക്ക് ഇതിഹാദ് വാര്‍ഷിക പ്രതിഫലമായി വാഗ്ദാനം ചെയ്തതെന്നാണു സൂചന. ചെല്‍സിയില്‍ പുതിയ കരാര്‍ ഒപ്പുവെക്കാന്‍ കാന്റെ തയാറായിരുന്നു. ഇത്തിഹാദിന്റെ വാഗ്ദാനം വന്നതോടെ താരം ചെല്‍സി വിടാന്‍ തീരുമാനിച്ചു. കരാര്‍ കാലാവധി അവസാനിച്ചതിനാല്‍ ചെല്‍സിക്കു ട്രാന്‍സ്ഫര്‍ തുക ലഭിക്കില്ല. പരുക്ക് കാരണം കാന്റെ ഇപ്പോഴും പുറത്തിരിക്കുകയാണ്. കഴിഞ്ഞ സീസണിന്റെ തുടക്കം മുതല്‍ കാന്റെ പരുക്കിന്റെ പിടിയിലായിരുന്നു.

2016 മുതല്‍ ചെല്‍സിയുടെ പ്രധാന താരമാണ് കന്റെ. പ്രീമിയര്‍ ലീഗ്, എഫ്.എ. കപ്പ്, ചാമ്പ്യന്‍സ് ലീഗ് കിരീടങ്ങള്‍ തുടങ്ങിയ നേട്ടങ്ങള്‍ നേടാന്‍ കാന്റെ ചെല്‍സിയെ സഹായിച്ചു. ഫ്രാന്‍സിനൊപ്പം ലോകകപ്പ് കിരീടവും ഉയര്‍ത്തിയിട്ടുണ്ട്. ബെന്‍സൈമ 14 വര്‍ഷത്തിനു ശേഷമാണ് സ്പാനിഷ് ക്ലബ് റയാല്‍ മാഡ്രിഡിനോടു വിട പറഞ്ഞത്. 35 വയസുകാരനായ താരം ഇതിഹാദിലേക്കു കൂടുമാറുമെന്നു സൂചനയുണ്ടായിരുന്നു. 100 ദശലക്ഷം പൗണ്ടാണ് അല്‍ എതിഹാദ് ബെന്‍സൈമയ്ക്കു വാഗ്ദാനം ചെയ്തത്. ഫ്രഞ്ച് താരം ഇന്നലെ ജിദ്ദയിലെത്തി. പിന്നാലെ മൂന്ന് വര്‍ഷത്തെ കരാര്‍ ഒപ്പുവച്ചു.

കഴിഞ്ഞ വര്‍ഷത്തെ ബാലന്‍ ഡി ഓര്‍ പുരസ്‌കാര ജേതാവാണ്. ബെന്‍സൈമയുടെ റയാലിലെ അവസാന സീസണില്‍ തുടരെ പരുക്ക് അലട്ടിയിരുന്നു. പരുക്ക് കാരണം ഖത്തര്‍ ലോകകപ്പിനുള്ള ഫ്രഞ്ച് ടീമിലും ഇടംകിട്ടിയില്ല. വെറ്ററന്‍ സ്‌ട്രൈക്കര്‍ ഒരു സീസണ്‍ കൂടി റയലില്‍ തുടരുമെന്നാണു കരുതിയത്. സൗദിയില്‍ നിന്നുള്ള കോടികളുടെ വാഗ്ദാനമാണു മനംമാറ്റത്തിനു കാരണം.