ന്യൂഡല്‍ഹി: കശ്മിരിലെ സ്ഥിതിഗതികള്‍ വിലയിരുത്താനായി കേന്ദ്ര ആഭ്യന്തരമന്ത്രി രാജ്‌നാഥ് സിങ് വീണ്ടും താഴ്‌വരയിലേക്ക്. ഇന്നു മുതല്‍ രണ്ടു ദിവസത്തെ സന്ദര്‍ശനമാണ് മന്ത്രി നടത്തുന്നത്. ജമ്മുകശ്മിരിലെ പ്രതിപക്ഷ നേതാക്കളുടെ സംയുക്തസംഘം പ്രധാനമന്ത്രി നരേന്ദ്രമോദിയുമായി ചര്‍ച്ച നടത്തിയതിനു പിന്നാലെയാണ് ആഭ്യന്തരമന്ത്രിയുടെ സന്ദര്‍ശനം.
സംസ്ഥാനത്തെ വിവിധ രാഷ്ട്രീയ പാര്‍ട്ടികളുമായും ജനങ്ങളുമായും മന്ത്രി ചര്‍ച്ച നടത്തുമെന്നാണു കരുതുന്നത്. കശ്മിരില്‍ സമാധാനം പുന:സ്ഥാപിക്കാന്‍ കേന്ദ്ര സര്‍ക്കാര്‍ ഇടപെടണമെന്ന് ആവശ്യപ്പെട്ടാണ് നാഷണല്‍ കോണ്‍ഫറന്‍സ് നേതാവ് ഉമര്‍ അബ്ദുല്ലയുടെ നേതൃത്വത്തിലുള്ള സംഘം പ്രധാനമന്ത്രിയെ കണ്ടത്. ജൂലൈ എട്ടിന് ഹിസ്ബുല്‍ മുജാഹിദീന്‍ തീവ്രവാദി ബുര്‍ഹാന്‍ വാനിയെ സൈന്യം വധിച്ചതിന് പിന്നാലെയാണ് കശ്മിരില്‍ രൂക്ഷമായ സംഘര്‍ഷം ആരംഭിച്ചത്. ഒന്നരമാസത്തോളമായി സംസ്ഥാനത്ത് തുടരുന്ന സംഘര്‍ഷങ്ങളില്‍ 68ഓളം പേര്‍ കൊല്ലപ്പെട്ടിട്ടുണ്ട്. ആറായിരത്തോളം പേര്‍ ആശുപത്രിയില്‍ ചികിത്സയിലാണ്.