ബഗ്ദാദ്: ഇറാഖില്‍ സൈന്യത്തിനു നേരെ ഐ.എസിന്റെ രാസായുധ ആക്രമണം. മൂസിലിനടുത്താണ് സംഭവം.
റോക്കറ്റ് ആക്രമണത്തിനൊപ്പമാണ് ക്ലോറിന്‍ വാതകം സൈന്യത്തിനു നേരെ ഐ.എസ് പ്രയോഗിച്ചത്. വടക്കന്‍ മൂസിലിലെ ഖയ്യാറയിലാണ് ആക്രമണമെന്ന് ഇറാഖി പൊലിസ് ഉദ്യോഗസ്ഥര്‍ പറഞ്ഞു. മൂന്ന് സൈനികര്‍ക്ക് ദേഹാസ്വാസ്ഥ്യമുണ്ടായി. എന്നാല്‍ ഇറാഖ് സംഭവത്തോട് പ്രതികരിച്ചിട്ടില്ല.
മൂസില്‍ ഐ.എസില്‍ നിന്ന് തിരിച്ചുപിടിക്കാന്‍ സൈന്യം ആക്രമണം ശക്തിപ്പെടുത്തിയിട്ടുണ്ട്. ഇറാഖിലെ ഏറ്റവും വലിയ രണ്ടാമത്തെ നഗരമാണ് മൂസില്‍. 2014 ലാണ് ഇവിടെ ഐ.എസ് സ്വാധീനമുറപ്പിച്ചത്.
അന്നുമുതല്‍ യു.എസ് സൈന്യത്തിന്റെ നേതൃത്വത്തില്‍ ഐ.എസിനെതിരേ ആക്രമണം നടക്കുന്നുണ്ടെങ്കിലും ഐ.എസില്‍ നിന്ന് നഗരത്തെ മോചിപ്പിക്കാനായിട്ടില്ല.