ന്യൂഡല്‍ഹി: ജ്ഞാന്‍വാപി മസ്ജിദ് മാതൃകയില്‍ ഉത്തര്‍പ്രദേശ് മഥുരയിലെ ഈദ്ഗാഹ് പള്ളിക്കുള്ളില്‍ ശാസ്ത്രീയ പരിശോധന നടത്താന്‍ ഉത്തരവിടണമെന്നാവശ്യപ്പെട്ട് ശ്രീകൃഷ്ണ ജന്‍മഭൂമി മുക്തി നിര്‍മാണ്‍ ട്രസ്റ്റ് സുപ്രിംകോടതിയെ സമീപിച്ചു. ശ്രീകൃഷ്ണ ജന്‍മഭൂമി തകര്‍ത്താണ് ഷാഹി ഈദ്ഗാഹ് പള്ളി നിര്‍മിച്ചതെന്ന് ചൂണ്ടിക്കാട്ടിയാണ് ഹരജി. ഈ ആവശ്യം അലഹബാദ് ഹൈക്കോടതി തള്ളിയതിന് പിന്നാലെ ട്രസ്റ്റ് സുപ്രിംകോടതിയെ സമീപിക്കുകയായിരുന്നു. പള്ളിയ്ക്കുള്ളില്‍ പരിശോധന നടത്താന്‍ ഉത്തരവിടാന്‍ സിവില്‍ കോടതിയോട് നിര്‍ദേശിക്കണമെന്നായിരുന്നു ഹൈക്കോടതിയില്‍ ട്രസ്റ്റ് ആവശ്യപ്പെട്ടത്.

ഇത്തരത്തിലൊരു ഹരജി നിലനില്‍ക്കുമോ ഇല്ലയോ എന്നകാര്യമാണ് ആദ്യം പരിഗണിക്കേണ്ടതെന്ന് ചൂണ്ടിക്കാട്ടി ചീഫ് ജസ്റ്റിസ് ജയന്ത് ബാനര്‍ജി അധ്യക്ഷനായ ഹൈക്കോടതി ബെഞ്ച് ഹരജി തള്ളി. കേസിലെ മറ്റൊരു ഭാഗവും ഈ ഘട്ടത്തില്‍ പരിഗണിക്കരുതെന്നും ബെഞ്ച് ഉത്തരവിടുകയും ചെയ്തു. ഹരജിയെ പള്ളിക്കമ്മറ്റിയും സുന്നി വഖഫ് ബോര്‍ഡും സിവില്‍ കോടതിയിലും ഹൈക്കോടതിയിലും എതിര്‍ത്തിരുന്നു. ഭൂജാതനായ ശ്രീകൃഷ്ണനും (ശ്രീകൃഷ്ണ വിരാജ്മാന്‍) മറ്റു ഏഴുപേരുമാണ് സിവില്‍ കോടതിയിലെ പ്രധാന ഹരജിക്കാര്‍. ഇതോടൊപ്പം 10ലധികം ഹരജികള്‍ വേറെയുമുണ്ട്.

കീഴ്‌ക്കോടതിയിലുള്ള കേസുകള്‍ മേല്‍ കോടതിയിലേക്ക് മാറ്റാന്‍ ഉത്തവിട്ട സാഹചര്യത്തില്‍ തുടര്‍ന്ന് സിവില്‍ കോടതിക്ക് ഈ ഹരജികള്‍ പരിഗണിക്കാനുള്ള അവകാശമില്ലെന്നും ഹൈക്കോടതി വ്യക്തമാക്കിയിരുന്നു. കേസുകള്‍ മാറ്റിയുള്ള ഉത്തരവിനെയും സുപ്രിംകോടതിയില്‍ ചോദ്യം ചെയ്തിട്ടുണ്ട്. വിഷയം ഹൈക്കോടതി തന്നെ പരിഗണിക്കുന്നതാണ് ഉചിതമെന്ന് ഇന്നലെ ഹരജിയില്‍ പ്രാഥമിക വാദത്തിനിടെ ജസ്റ്റിസുമാരായ എസ്.കെ കൗള്‍, സുധാന്‍ശു ധൂലിയ എന്നിവരടങ്ങിയ സുപ്രിംകോടതി ബെഞ്ച് അഭിപ്രായപ്പെട്ടു. വിഷയം നീളുന്നത് ഹരജിക്കാര്‍ വിവിധ ആവശ്യങ്ങള്‍ ഉന്നയിച്ച് നിരന്തരം ഹരജികള്‍ സമര്‍പ്പിക്കുന്നത് കൊണ്ടാണ്. കേസുകള്‍ വേഗത്തില്‍ തീര്‍ക്കുന്നതാണ് നല്ലതെന്നും ബെഞ്ച് നിരീക്ഷിച്ചു.

ഇനിയും മറ്റൊരു ഹരജി കൂടി കോടതിയിലെത്തുന്നില്ലെന്ന് ഉറപ്പാക്കണം. സിവില്‍ കോടതിയില്‍ നിന്ന് മേല്‍കോടതിയിലേക്ക് മാറ്റിയ കേസുകളുടെ വിവരങ്ങള്‍ അറിയിക്കാനും അലഹബാദ് ഹൈക്കോടതി രജിസ്ട്രാറോട് ബെഞ്ച് ആവശ്യപ്പെട്ടു.

സംഘ്പരിവാര്‍ 'പൊളിക്കാനുള്ള 30,000 പള്ളികളുടെ ലിസ്റ്റില്‍ ബാബരി മസ്ജിദിന് പിന്നില്‍ രണ്ടാമതായി ഉള്‍പ്പെടുത്തിയ പള്ളിയാണ് ഷാഹ് ഈദ്ഗാഹ് മസ്ജിദ്. പള്ളിയും ക്ഷേത്ര സമുച്ചയവും തമ്മില്‍ ഒരുമതിലിന്റെ അകലമെയുള്ളൂ. ഒന്നിലധികം ക്ഷേത്രങ്ങളുള്ള സമുച്ചയമാണ് ശ്രീകൃഷ്ണ ജന്മസ്ഥാന്‍ എന്ന് പറയുന്ന സ്ഥലം. ജ്ഞാന്‍ വാപിക്ക് മുമ്പ് തന്നെ ഈദ്ഗാഹ് മസ്ജിദ് പൊളിക്കാനുള്ള നീക്കങ്ങള്‍ അരംഭിച്ചിരുന്നു. എന്നാല്‍ കോടതികളുടെ ശക്തമായ ഇടപെടലിനെത്തുടര്‍ന്ന് നീണ്ടുപോവുകയായിരുന്നു. ബാബരി മസ്ജിദ് ഭൂമിയില്‍ രാമക്ഷേത്ര നിര്‍മാണം ഏറെക്കുറേ പൂര്‍ത്തിയാവുകയും ജ്ഞാന്‍ വാപിയില്‍ സര്‍വേ നടക്കുകയും ചെയ്തതോടെയാണ് ഈദ്ഗാഹ് മസ്ജിദും പിടിച്ചടക്കാനുള്ള നീക്കം വേഗത്തിലാക്കിയത്.