കാലിക്കറ്റില്‍ ഡിഗ്രി രണ്ടാം സെമസ്റ്റര്‍ ഉത്തരക്കടലാസുകള്‍ കാണാനില്ല

മലപ്പുറം: കാലിക്കറ്റ് സര്‍വകലാശാല പരീക്ഷാഭവനില്‍ നിന്ന് ബി.എ, ബി.കോം രണ്ടാം സെമസ്റ്റര്‍ ഇംഗ്ലീഷ് പേപ്പറിന്റെ ആയിരത്തിലേറെ ഉത്തരക്കടലാസുകള്‍ കാണാനില്ല. ബി.എ, ബി.കോം രണ്ടാം സെമസ്റ്റര്‍ (വിദൂര വിദ്യാഭ്യാസം) ഫലം ഈ മാസം അഞ്ചിന് പുറത്തുവന്നെങ്കിലും നിരവധി വിദ്യാര്‍ഥികളുടേത് പ്രസിദ്ധീകരിച്ചിരുന്നില്ല. തുടര്‍ന്ന് വിദ്യാര്‍ഥികള്‍ പരാതിയുമായി യൂനിവേഴ്‌സിറ്റിയില്‍ എത്തിയപ്പോഴാണ് ഉത്തരക്കടലാസുകള്‍ കാണാനില്ലെന്ന വിവരം ലഭിച്ചത്.

കൊണ്ടോട്ടി ഇ.എം.ഇ.എ കോളജ്, വളയംകുളം അസാബ് ആര്‍ട്‌സ് ആന്‍ഡ് സയന്‍സ് കോളജ്, വാഴയൂര്‍ വേദവ്യാസ കോളജ്, അല്‍ജാമിഅ ആര്‍ട്‌സ് ആന്‍ഡ് സയന്‍സ് കോളജ്, കൊണ്ടോട്ടി ബ്ലോസം ആര്‍ട്‌സ് ആന്‍ഡ് സയന്‍സ് കോളജ്, വളാഞ്ചേരി ബാഫഖിയ ബി.എഡ് കോളജ് എന്നിവിടങ്ങളില്‍ പരീക്ഷയെഴുതിയവരുടെ ഉത്തരക്കടലാസുകളാണ് കാണാതായത്. എന്നാല്‍, ഈ സെന്ററുകളില്‍ പരീക്ഷയെഴുതിയ ചില വിദ്യാര്‍ഥികളുടെ ഫലം വന്നിട്ടുമുണ്ട്. മാര്‍ക്ക് ലിസ്റ്റില്‍ പരീക്ഷാഫലം പിന്നീട് അറിയിക്കുമെന്നാണ് ചേര്‍ത്തിരിക്കുന്നതെന്ന് വിദ്യാര്‍ഥികള്‍ പറഞ്ഞു.

പരീക്ഷ അടുത്തമാസം വീണ്ടും നടത്തുമെന്നാണ് കാലിക്കറ്റ് യൂനിവേഴ്‌സിറ്റി അധികൃതര്‍ അറിയിച്ചിരിക്കുന്നത്. എന്നാല്‍, പരീക്ഷയ്ക്ക് അപേക്ഷ നല്‍കുന്നതിന്റെ കാലാവധി കഴിഞ്ഞ 16ന് അവസാനിച്ചു. മിക്കവരും അപേക്ഷ നല്‍കിയിട്ടില്ല.