മൂന്ന് ദശലക്ഷം ദിർഹം വരെ പിഴയും തടവും; ഡാറ്റ നിയമലംഘനം നടത്തുന്നവർക്ക് മുന്നറിയിപ്പുമായി യുഎഇ

ദുബൈ: സൈബർ കുറ്റകൃത്യങ്ങൾ സംബന്ധിച്ച നിയമം ലംഘിക്കുന്നതിനുള്ള ശിക്ഷയെക്കുറിച്ച് ഓർമപ്പെടുത്തി യുഎഇയിലെ പബ്ലിക് പ്രോസിക്യൂഷൻ. സാമ്പത്തിക, വാണിജ്യ സ്ഥാപനങ്ങളുമായി ബന്ധപ്പെട്ട ഡാറ്റ നിയമം ലംഘിക്കുന്നവർക്ക് അഞ്ച് വർഷമോ അതിൽ കൂടുതലോ തടവും 500,000 ദിർഹം മുതൽ മൂന്ന് ദശലക്ഷം ദിർഹം വരെ പിഴയും ലഭിക്കുമെന്ന് അതോറിറ്റി അറിയിച്ചു.

ഫെഡറൽ ഡിക്രി നിയമത്തിന്റെ ആർട്ടിക്കിൾ ഏട്ടിലെ 2021 ലെ 34 നിയമമാണ് കിംവദന്തികൾക്കും സൈബർ കുറ്റകൃത്യങ്ങൾക്കും എതിരെയുള്ളത്. ഇതുപ്രകാരം വിവരസാങ്കേതികവിദ്യ അല്ലെങ്കിൽ വിവരസാങ്കേതിക മാർഗ്ഗങ്ങൾ ഉപയോഗിച്ച് ഒരു സാമ്പത്തിക, വാണിജ്യ സ്ഥാപനത്തിന്റെ പ്രധാനപ്പെട്ട വിവരങ്ങൾ മറ്റൊരാൾക്ക് ലഭ്യമാക്കുന്ന, ഏറ്റെടുക്കുന്ന, മാറ്റങ്ങൾ വരുത്തുന്ന, നശിപ്പിക്കുന്ന, വെളിപ്പെടുത്തുന്ന, റദ്ദാക്കുന്ന, ഇല്ലാതാക്കുന്ന, ഭേദഗതി വരുത്തുന്ന, പുനർനിർമ്മിക്കുന്ന, പ്രസിദ്ധീകരിക്കുന്ന അല്ലെങ്കിൽ പുനഃപ്രസിദ്ധീകരിക്കുന്ന ഏതൊരു വ്യക്തിയും കുറ്റക്കാരനാണ്.

ഇത്തരത്തിൽ ഒരു സ്ഥാപനത്തിന്റെ കോൺഫിഡൻഷ്യൽ ഡാറ്റയുമായി ബന്ധപ്പെട്ട കുറ്റകൃത്യങ്ങൾ ചെയ്‌താൽ അഞ്ച് വർഷമോ അതിൽ കൂടുതലോ തടവും 500,000 ദിർഹം മുതൽ മൂന്ന് ദശലക്ഷം ദിർഹം വരെ പിഴയും ലഭിക്കും.