കൊച്ചി: എറണാകുളത്ത് എ.ടി.എമ്മില്‍ കൃത്രിമം നടത്തി കാല്‍ലക്ഷം രൂപ തട്ടിയെടുത്ത പ്രതി പിടിയില്‍. ഉത്തര്‍പ്രദേശ് സ്വദേശി മുബാറക്ക് ആണ് പിടിയിലായത്. ഇടപ്പള്ളിയില്‍ നിന്നാണ് ഇയാള്‍ പൊലിസ് പിടിയിലായത്. ഇയാള്‍ ഉപയോഗിച്ച ഉപകരണങ്ങളും കണ്ടെടുത്തിട്ടുണ്ട്.

കൊച്ചിയില്‍ സൗത്ത് ഇന്‍ഡ്യന്‍ ബാങ്കിന്റെ എ.ടി.എമ്മുകളിലായി 11 ഇടങ്ങളിലാണ് തട്ടിപ്പ് നടന്നത്. എ.ടി.എമ്മിലെ പണം വരുന്ന ഭാഗത്ത് സ്‌കെയില്‍ പോലുള്ള ഉപകരണം വെച്ചായിരുന്നു ഇയാള്‍ പണം കവര്‍ന്നത്. പണം പിന്‍വലിക്കാന്‍ വരുന്ന ആളുകള്‍ക്ക് എ.ടി.എമ്മില്‍ നിന്നും പണം എണ്ണി ഡിസ്‌പെന്‍സറിലെത്തുന്നതിന്റെ ശബ്ദം കേള്‍ക്കുമെങ്കിലും പണം ലഭിക്കില്ല. എന്നാല്‍ പണം പിന്‍വലിച്ചതായി ഫോണ്‍ സന്ദേശം ലഭിക്കുകയും ചെയ്യും. എ.ടി.എം കാര്‍ഡ് ഉടമ മടങ്ങിയതോടെ സ്‌കെയില്‍ പോലുള്ള ഉപകരണം വലിച്ചെടുക്കും. ഈ സമയം പണം പുറത്തേക്ക് വരും. പിന്നീട് വീണ്ടും ഉപകരണം ഘടിപ്പിച്ച് അടുത്ത ഇടപാടുകാരന്‍ വരും വരെ കാത്തിരിക്കും.

ചിലര്‍ ഇത് എടിഎം മെഷീനിന്റെ തകരാരാണെന്ന് ധരിച്ച് തിരിച്ച് പോയി. പന്തികേട് തോന്നിയ ഒരു ഇടപാടുകാരന്‍ ബാങ്കില്‍ പരാതി നല്‍കി. പിന്നീട് എടിമ്മിലെ സിസിടിവി ദൃശ്യം പരിശോധിച്ചപ്പോഴാണ് തട്ടിപ്പ് പുറത്ത് വന്നത്.