ഗൂഡല്ലൂര്‍: വനങ്ങളില്‍ വ്യാപിച്ച പാര്‍ത്തീനിയം വിഷചെടികള്‍ നശിപ്പിച്ച് കളയണമെന്നാവശ്യം ശക്തമാകുന്നു. നീലഗിരിയിലെ കുന്നൂര്‍, കൊലകൊമ്പ, മഞ്ചൂര്‍, കോത്തഗിരി, ഊട്ടി, ഗൂഡല്ലൂര്‍, പന്തല്ലൂര്‍, മുതുമല, മസിനഗുഡി തുടങ്ങിയ സ്ഥലങ്ങളില്‍ പാര്‍ത്തീനിയം വ്യാപകമായിരിക്കുകയാണ്.
വനങ്ങളില്‍ പാര്‍ത്തീനിയം വിഷചെടികള്‍ മുളച്ച് പൊന്തിയതിനാല്‍ മറ്റ് ചെടികള്‍ വളരാതെയായിരിക്കുകയാണ്. ഇതിനാല്‍ വന്യജീവികളാണ് ഏറെ പ്രയാസത്തിലായിരിക്കുന്നത്. വന്യജീവികള്‍ക്ക് ആവശ്യമായ ഭക്ഷ്യവസ്തുക്കള്‍ വനത്തില്‍ ഇല്ലാത്ത സ്ഥിതിയാണുള്ളത്. വിദേശ രാജ്യങ്ങളായ അമേരിക്ക, ചൈന, ആസ്‌ത്രേലിയ തുടങ്ങിയ സ്ഥലങ്ങളില്‍ നിന്ന് 1952ലാണ് പാര്‍ത്തീനിയം വിഷചെടികള്‍ ഇന്ത്യയിലേക്ക് എത്തിയത്. മഹാരാഷ്ട്രയിലാണ് ആദ്യം ഈ ചെടികള്‍ കണ്ടുതുടങ്ങിയത്. വിദേശത്ത് നിന്ന് ഗോതമ്പ് ഇറക്കുമതി ചെയ്തതില്‍ നിന്നാണ് വിഷചെടികളുടെ വിത്തുകളും ഇവിടേക്ക് എത്തിയത്. ആസ്തമ ഉള്‍പ്പെടെയുള്ള പല മാരക രോഗങ്ങള്‍ക്ക് ഇത് കാരണമാകുകയും ചെയ്യും.
ഇവ നശിപ്പിക്കാന്‍ സംസ്ഥാന സര്‍ക്കാര്‍ ഉത്തരവിട്ടിരുന്നു. എല്ലാ ജില്ലകളിലും ഇവ നശിപ്പിച്ചിരുന്നുവെങ്കിലും നീലഗിരി ജില്ലയില്‍ ഇത് നശിപ്പിക്കാന്‍ അധികാരികള്‍ തയ്യാറായിരുന്നില്ല. അതിന്റെ പരിണിത ഫലമാണ് ഇവ വ്യാപകമാകാന്‍ കാരണമായത്. പാര്‍ത്തീനിയം വിഷചെടികള്‍ നശിപ്പിക്കുന്നതിന് ആവശ്യമായ നടപടികള്‍ സ്വീകരിക്കണമെന്നാണ് ജനങ്ങളുടെ ആവശ്യം.