കോഴിക്കോട്: കേരള സ്‌കൂള്‍ ടീച്ചേഴ്‌സ് യൂണിയന്‍ മുന്‍ മുഖ്യമന്ത്രി സി.എച്ച് മുഹമ്മദ് കോയയുടെ സ്മരണാര്‍ത്ഥം നടത്തുന്ന സി.എച്ച്പ്രതിഭ ക്വിസ് സീസണ്‍ 4 സെപ്തംബര്‍ 25 ന് തുടങ്ങുന്നു. കേരളത്തിലെ പൊതു വിദ്യാഭ്യാസ വകുപ്പിന്റെ അംഗീകാരമുള്ള വിദ്യാലയങ്ങളിലെ എല്‍ പി യുപി ഹൈസ്‌കൂള്‍ ഹയര്‍ സെക്കണ്ടറി തലങ്ങളിലാണ് ക്വിസ് മത്സരം നടത്തുന്നത്.പ്രാഥമിക ഘട്ടം സപ്തമ്പര്‍ 25 ന് ഓണ്‍ലൈന്‍ ആയിട്ടും സബ് ജില്ല ജില്ല തലങ്ങള്‍ ഫിസിക്കല്‍ ഓണ്‍ലൈനായിട്ടുമാണ് കുട്ടികള്‍ പങ്കെടുക്കേണ്ടത്.

സംസ്ഥാന തലത്തിലുള്ള മെഗാഫൈനല്‍ ഒക്ടോബര്‍ 16 ന് തിരുവനന്തപുരത്ത് വെച്ച് നടക്കുന്നതാണ്. വിദ്യാഭ്യാസ സാമൂഹിക മേഖലകളില്‍ ഉന്നതമായ രേഖപ്പെടുത്തലുകള്‍ നടത്തിയ സി എച്ച് മുഹമ്മദ് കോയ എന്ന പ്രതിഭയെ കേരളത്തിലെ വിദ്യാര്‍ത്ഥികള്‍ക്ക് പരിചയപ്പെടുത്തുന്നതോടൊപ്പം സ്‌കൂള്‍ വിദ്യാര്‍ത്ഥികളില്‍ നിന്ന് മികച്ച പ്രതിഭകളെ കണ്ടെത്തി അവര്‍ക്ക് നിരവധി സമ്മാനങ്ങളും നല്‍കുകയും ചെയ്യുകയാണ് കേരള സ്‌കൂള്‍ ടീച്ചേഴ്‌സ് യൂണിയന്റെ ഈ ക്വിസ് മല്‍സരം കൊണ്ട് ഉദ്ദേശിക്കുന്നതെന്ന് സംസ്ഥാന പ്രസിഡന്റ് കരീം പടുകുണ്ടില്‍ വാല്‍ത്താസമ്മേളനത്തില്‍ അറിയിച്ചു.

ഓരോ തലത്തിലെയും ഒന്നാം സ്ഥാനക്കാര്‍ക്ക് ലാപ്‌ടോപ്പും രണ്ടും മൂന്നും സ്ഥാനങ്ങളില്‍ എത്തുന്നവര്‍ക്ക് യഥാക്രമം ടാബ്ലറ്റുകളും സ്മാര്‍ട്ട് ഫോണുകളും സമ്മാനമായി നല്‍കുന്നു. വാര്‍ത്താ സമ്മേളനത്തില്‍ ഓര്‍ഗനൈസിങ്ങ് സെക്രട്ടറി പി.കെ.അസീസ് കല്ലുര്‍ മുഹമ്മദലി പ്രതിഭ ക്വിസ് കണ്‍വീനര്‍ ടി.പി.അബ്ദുല്‍ ഗഫൂര്‍ ജില്ലാ പ്രസിഡന്റ് കെ.എം എ നാസര്‍ പ്രതിഭ ക്വിസ് കോഓഡിനേറ്റര്‍ ഫൈസല്‍ പടനിലം പങ്കെടുത്തു. വിജയികള്‍ക്കുള്ള സമ്മാനങ്ങള്‍ സ്‌പോണ്‍സര്‍ ചെയ്യുന്നത് വേറ്റു നിക്കാഹ് ഡോട്ട് കോം ആണ്.