ഈരാറ്റുപേട്ട: ഒന്നാം പാദവാര്‍ഷിക പരീക്ഷ എഴുതാന്‍ വിദ്യാര്‍ഥികള്‍ തയ്യാറെടുക്കമ്പോള്‍ ഈരാറ്റുപേട്ട ഉപജില്ലയിലെ സ്‌കൂളുകളില്‍ ഇനിയും പാഠപുസ്തകങ്ങള്‍ ലഭിക്കാത്ത വിദ്യാര്‍ഥികള്‍ ഏറെ. സ്‌കൂള്‍ അധികൃതര്‍ വിദ്യാര്‍ഥികള്‍ക്ക് പാഠപുസ്തകമെത്തിക്കാന്‍ നെട്ടോട്ടമോടുകയാണ്.
ഒരു വിദ്യാഭ്യാസ ജില്ലയില്‍ നിന്ന് ലഭിക്കാതെ വന്നപ്പോള്‍ അടുത്ത വിദ്യാഭ്യാസ ജില്ലാ ഓഫിസുകളുമായി ബന്ധപ്പെട്ടിട്ടും പ്രശ്‌നങ്ങള്‍ക്ക് പരിഹാരമായിട്ടില്ല.
കുറെയധികം ഫോട്ടോസ്റ്റാറ്റ് കോപ്പികള്‍ എടുത്ത് നല്‍കിയെങ്കിലും എല്ലാ കുട്ടികള്‍ക്കും പുസ്തകം നല്‍കാന്‍ ഇതുവരെയും കഴിഞ്ഞിട്ടില്ല. പല പ്രാവശ്യം രേഖാമൂലം അധികൃതരെ സമീപിച്ചെങ്കിലും അവര്‍ കൈമലര്‍ത്തുകയാണ് ചെയ്തത്.
ആവശ്യമായ പുസ്തകങ്ങളുടെ എണ്ണം ജൂണില്‍ തന്നെ നല്‍കിയതാണ്. 10-ാം ക്ലാസിലെ മലയാളം മീഡിയം സോഷ്യല്‍ സയന്‍സ്, ഗണിതം എന്നീ പുസ്തകങ്ങള്‍ കിട്ടാത്തത് വിദ്യാര്‍ത്ഥികള്‍ക്ക് ഏറെ പ്രയാസങ്ങള്‍ സൃഷ്ടിക്കുന്നു. പാഠപുസ്തകങ്ങള്‍ അടിയന്തിരമായി സുകുളുകളില്‍ എത്തിക്കാന്‍ വേണ്ട നടപടികള്‍ സ്വീകരിക്കണമെന്ന് രക്ഷിതാക്കളും സ്‌കൂള്‍ അധികൃതരും ആവശ്യപ്പെടുന്നു.