തിരുവനന്തപുരം • കണ്ണൂർ വി.സി നിയമനവുമായി ബന്ധപ്പെട്ട് മുഖ്യമന്ത്രിക്കെതിരായ ഹരജിയിൽ തിരുവനന്തപുരം വിജിലൻസ് പ്രത്യേക കോടതിയിൽ ഡയരക്ടർ ജനറൽ ഓഫ് പ്രോസിക്യൂഷൻ ഹാജരാകും.
വിജിലൻസ് അഡിഷണൽ ഡയരക്ടർ ഓഫ് പ്രോസിക്യൂഷനെ ഒഴിവാക്കിയാണ് ആഭ്യന്തര വകുപ്പിന്റെ തീരുമാനം. വിജിലൻസ് ഡയരക്ടറുടെ ശുപാർശയിലാണ് ഉത്തരവ്.
പ്രോസിക്യൂട്ടർമാർ ഇല്ലാത്തതിനാൽ വിജിലൻസ് കോടതിയിൽ കേസുകൾ കെട്ടി കിടക്കുമ്പോഴാണ് മുഖ്യമന്ത്രിക്കായി ഡയരക്ടർ ജനറൽ ഓഫ് പ്രോസിക്യൂഷൻ ഹാജരാകുന്നത്. കോൺഗ്രസ് നേതാവ് ജ്യോതികുമാർ ചാമക്കാല നൽകിയ ഹരജി 29നാണ് കോടതി പരിഗണിക്കുന്നത്.
കണ്ണൂർ വി.സി നിയമനത്തിൽ മുഖ്യമന്ത്രി ഇടപെട്ടെന്ന ഗവർണറുടെ ആരോപണത്തിന്റെ അടിസ്ഥാനത്തിലാണ് ജ്യോതികുമാർ ചാമക്കാല തിരുവനന്തപുരം വിജിലൻസ് കോടതിയിൽ ഹരജി നൽകിയത്. കണ്ണൂർ സർവകലാശാലയുടെ വൈസ് ചാൻസലറായി ഗോപിനാഥ് രവീന്ദ്രന് പുനർനിയമനം നൽകാൻ മുഖ്യമന്ത്രി ആവശ്യപ്പെട്ടെന്ന ഗവർണറുടെ വെളിപ്പെടുത്തലും ഇതു സംബന്ധിച്ച് ഗവർണർക്ക് നൽകിയ കത്തുകളും ഹരജിയിൽ ചുണ്ടിക്കാട്ടിയിട്ടുണ്ട്. മുഖ്യമന്ത്രിയുടെ നടപടി സത്യപ്രതിജ്ഞാലംഘനവും സ്വജനപക്ഷപാതവുമാണ്. അതിനാൽ മുഖ്യമന്ത്രിക്കെതിരേ കേസെടുത്ത് അന്വേഷണം നടത്തി ശിക്ഷിക്കണമെന്നാണ് ജ്യോതികുമാർ ചാമക്കാലയുടെ ആവശ്യം.
അതിനിടെ, മുഖ്യമന്ത്രിക്കെതിരേ പ്രോസിക്യൂഷൻ അനുമതി തേടി ജ്യോതികുമാർ ചാമക്കാല ഗവർണർക്ക് കത്തും നൽകിയിട്ടുണ്ട്. ഇതിൽ ഗവർണർ തീരുമാനമെടുത്തിട്ടില്ല.