ഇരിട്ടി: കാക്കയങ്ങാട് സി.പി.എമ്മുകാര്‍ക്കും പൊലിസിനും നേരെ അക്രമം. ഘോഷയാത്രയ്ക്കു ശേഷം രാത്രി വീട്ടിലേക്കു പോകവെ പുല്ലാഞ്ഞിയോട് ബ്രാഞ്ച് സെക്രട്ടറി സുരേഷ്, വിനോദ് എന്നിവര്‍ക്കു നേരേയാണ് ആക്രമണം ഉണ്ടായത്. ഇവരെ കണ്ണൂര്‍ എ.കെ.ജി ആശുപത്രിയില്‍ പ്രവേശിപ്പിച്ചു. അക്രമം തടയാന്‍ ശ്രമിച്ച എ.എസ്.ഐമാരായ രാജന്‍, ചാക്കോ, പൊലിസ് ഡ്രൈവര്‍ ഷൗക്കത്തലി എന്നിവര്‍ക്കും പരുക്കേറ്റു. ഇവരെ ഇരിട്ടി താലൂക്ക് ആശുപത്രിയില്‍ പ്രവേശിപ്പിച്ചു. സുരേഷിനെ ആക്രമിച്ച ആര്‍.എസ്.എസ് പ്രവര്‍ത്തകരായ കാക്കയങ്ങാട്ടെ മഹേഷ് (36), ബിനീഷ് (34), സജീവന്‍ (34) എന്നിവരെ അറസ്റ്റുചെയ്തു. ഇവര്‍ സഞ്ചരിച്ച ബൈക്കും കസ്റ്റഡിയിലെടുത്തു. സംഭവവുമായി ബന്ധപ്പെട്ട് അഞ്ചുപേരെകൂടി പൊലിസ് കസ്റ്റഡിയിലെടുത്തിട്ടുണ്ട്.
ബുധനാഴ്ച കാക്കയങ്ങാട് ശോഭായാത്രയ്ക്കു നേരെയുണ്ടായ അക്രമത്തില്‍ പ്രതിഷേധിച്ച് മുഴക്കുന്ന് പഞ്ചായത്തില്‍ ഹിന്ദു ഐക്യവേദി നേതൃത്വത്തില്‍ ആചരിച്ച ഹര്‍ത്താല്‍ പൂര്‍ണമായിരുന്നു. മര്‍ദനമേറ്റ മുഴക്കുന്ന് പഞ്ചായത്ത് അംഗം കെ ഉമേശന്‍, കാക്കയങ്ങാട് സ്വദേശികളായ ലിപിന്‍, അരുണ്‍ എന്നിവര്‍ ഇരിട്ടി താലൂക്ക് ആശുപത്രിയില്‍ ചികിത്സയിലാണ്.