കൊല്ലത്ത് ഭാര്യയെ ജോലി സ്ഥലത്ത് തീ കൊളുത്തിക്കൊന്ന് ഭര്‍ത്താവ് ജീവനൊടുക്കി

കൊല്ലം: അക്ഷയ സെന്റര്‍ ജീവനക്കാരിയെ പെട്രോള്‍ ഒഴിച്ചു കത്തിച്ചു കൊലപ്പെടുത്തിയ ശേഷം ഭര്‍ത്താവ് കഴുത്തുമുറിച്ച് കിണറ്റില്‍ ചാടി ആത്മഹത്യ ചെയ്തു. നാവായിക്കുളം സ്വദേശി റഹീമാണ് ഭാര്യ നദീറയെ കൊലപ്പെടുത്തിയ ശേഷം ആത്മഹത്യ ചെയ്തത്. തിങ്കളാഴ്ച്ച രാവിലെ 9 മണിയോടെയായിരുന്നു സംഭവം.

പാരിപ്പള്ളി അക്ഷയകേന്ദ്രത്തിലെ ജീവനക്കാരിയായിരുന്നു നദീറ. രാവിലെ ഇവര്‍ ജോലിസ്ഥലത്തെത്തിയിരുന്നു. പിന്നാലെ കോട്ട് ധരിച്ച് മുഖം മറച്ചെത്തിയ റഹീം ഇവരെ പെട്രോള്‍ ഒഴിച്ച് കത്തിക്കുകയായിരുന്നു. ഇതിന് ശേഷം ഇറങ്ങിയോടിയ ഇയാള്‍ കഴുത്ത് മുറിച്ച ശേഷം സമീപത്തെ പറമ്പിലെ കിണറ്റില്‍ ചാടുകയായിരുന്നു.

ഒരു മാസം മുന്‍പ് നദീറയെ തലയ്ക്കടിച്ച് പരുക്കേല്‍പ്പിച്ച കേസില്‍ റഹീം ജയിലിലായിരുന്നു. 3 ദിവസം മുന്‍പാണ് ഇയാള്‍ ജയില്‍മോചിതനായത്. ദാമ്പത്യപ്രശ്‌നങ്ങളാണ് കൊലപാതകത്തിലേക്ക് നയിച്ചതെന്നാണ് പൊലിസിന്റെ പ്രാഥമിക നിഗമനം.