ന്യൂഡല്‍ഹി: ഇന്ത്യയില്‍ പെണ്‍കുട്ടികള്‍ക്കിടയില്‍ ഏറ്റവുമധികം ശൈശവ വിവാഹം നടക്കുന്നത് ജാര്‍ഖണ്ഡിലാണെന്ന് കേന്ദ്ര ആഭ്യന്തര മന്ത്രാലയത്തിന്റെ റിപ്പോര്‍ട്ട്. പെണ്‍കുട്ടികളിലെ ആകെ ശൈശവ വിവാഹത്തിന്റെ 5.8 ശതമാനവും ജാര്‍ഖണ്ഡിലാണെന്ന് കണക്കുകള്‍ വ്യക്തമാക്കുന്നു. ആഭിചാരക്രിയയുടെ ഭാഗമായി കുട്ടികളെ കൊലപ്പെടുത്തുന്നവരുടെ എണ്ണത്തിലും സംസ്ഥാനമാണ് ഏറ്റവും മുന്നില്‍.

ദേശീയ തലത്തില്‍ 18 വയസ്സ് തികയുന്നതിന് മുമ്പ് വിവാഹിതരാവുന്ന വനിതകളുടെ എണ്ണം ആകെ വനിതകളുടെ 1.9 ശതമാണെന്ന് രജിസ്ട്രാര്‍ ജനറല്‍ ആന്റ് സെന്‍സസ് കമ്മീഷണര്‍ ഓഫിസ് രേഖകള്‍ വ്യക്തമാക്കുന്നതായി ആഭ്യന്തര മന്ത്രാലയം അറിയിച്ചു. കേരളത്തിലാണ് ശൈശവ വിവാഹങ്ങള്‍ ഏറ്റവും കുറവ്. ജാര്‍ഖണ്ഡില്‍ നഗരങ്ങളെ അപേക്ഷിച്ച് ഗ്രാമങ്ങളിലാണ് ശൈശവ വിവാഹങ്ങള്‍ കൂടുതല്‍.

ജാര്‍ഖണ്ഡിലും പശ്ചിമബംഗാളിലും വനിതകളില്‍ പകുതിയിലേറെ പേരും 21 വയസ്സ് തികയുന്നതിന് മുമ്പ് വിവാഹിതരായി. പശ്ചിമബംഗാളില്‍ 54.9 ശതമാനം വനിതകളും 21 വയസ്സ് തികയുന്നതിന് മുമ്പ് വിവാഹിതരായതായി രേഖകള്‍ വ്യക്തമാക്കുന്നു. ജാര്‍ഖണ്ഡില്‍ ഇത് 54.6 ശതമാനമാണ്. രാജ്യത്ത് വനിതകളില്‍ 29.5 ശതമാനവും 21 വയസ്സ് തികയുന്നതിന് മുമ്പ് വിവാഹിതരായി.

ആഭിചാരക്രിയയുടെ ഭാഗമായി 2015ല്‍ ജാര്‍ഖണ്ഡില്‍ 32 കുട്ടികളെ കൊലപ്പെടുത്തിയിരുന്നു. 2019, 2020 വര്‍ഷങ്ങളില്‍ 15 കുട്ടികളും കൊലചെയ്യപ്പെട്ടു.