തിരുവനന്തപുരം: വിഴിഞ്ഞം സമരം മൂലമുണ്ടായ നഷ്ടം ലത്തീന്‍ അതിരൂപതയില്‍ നിന്ന് ഈടാക്കണമെന്ന് തുറമുഖ നിര്‍മാണകമ്പനിയായ വിസില്‍. ഇക്കാര്യമാവശ്യപ്പെട്ട് കമ്പനി സര്‍ക്കാരിന് കത്ത് നല്‍കി.

ഇതുവരെ 100 കോടി രൂപ നഷ്ടമുണ്ടായതായും നഷ്ടത്തിന്റെ പൂര്‍ണ ഉത്തരവാദിത്വം അതിരൂപതയ്ക്കാണെന്നും വിസില്‍ കത്തില്‍ പറയുന്നു.

സെപ്തംബര്‍ 30 വരെ നഷ്ടം 78.70 കോടി, പലിശ ഇനത്തില്‍ നഷ്ടം 19 കോടിയാണെന്നും കത്തില്‍ പറയുന്നു. വാടകയ്ക്ക് എടുത്ത യന്ത്രങ്ങള്‍ ഉപയോഗിക്കാത്തതിനാല്‍ നഷ്ടം 57 കോടി രൂപയാണെന്നും അദാനി ഗ്രൂപ്പ് പറയുന്നു.

കഴിഞ്ഞ ദിവസം വിഴിഞ്ഞം തുറമുഖ നിര്‍മാണവുമായി ബന്ധപ്പെട്ട് മത്സ്യത്തൊഴിലാളികള്‍ നടത്തുന്ന സമരത്തിന്റെ പന്തല്‍ ഉടന്‍ പൊളിച്ചുനീക്കണമെന്ന് ഹൈക്കോടതി നിര്‍ദ്ദേശിച്ചിരുന്നു. അദാനി ഗ്രൂപ്പിന്റെ ഹരജിയിലാണ് ഹൈക്കോടതി ഉത്തരവിറക്കിയത്.

2023 ല്‍ പണി പൂര്‍ണമായും തീര്‍ത്ത് കപ്പല്‍ എത്തിത്തുടങ്ങുന്ന രീതിയിലാണ് പണി ആരംഭിച്ചത്. എന്നാല്‍ വിഴിഞ്ഞത്ത് മത്സ്യത്തൊഴിലാളികളുടെ സമരം തുടങ്ങിയതോടെയാണ് കാര്യങ്ങള്‍ താളം തെറ്റിയത്.