കോട്ടയം: കോണ്‍ഗ്രസ് അധ്യക്ഷ സ്ഥാനത്തേക്ക് മത്സരിക്കുന്ന ശശി തരൂരിനെ അനുകൂലിച്ച് കോട്ടയം ഈരാറ്റുപേട്ടയില്‍ ഫ്‌ളക്‌സ് ബോര്‍ഡുകള്‍. 'ശശി തരൂര്‍ നമ്മെ നയിക്കട്ടെ, കോണ്‍ഗ്രസ് വളരട്ടെ' എന്നെഴുതിയ ബോര്‍ഡുകളാണ് സ്ഥാപിച്ചിരിക്കുന്നത്. കോണ്‍ഗ്രസിന്റെ പേരിലാണ്‌ബോര്‍ഡുകള്‍ വെച്ചിരിക്കുന്നത്.

പോസ്റ്ററുകള്‍ തങ്ങളുടേതല്ലെന്ന് കോണ്‍ഗ്രസ് ജില്ലാ നേതൃത്വം പറഞ്ഞു. നേരത്തെ പാലായിലും തരൂരിനെ അനുകൂലിച്ച് ഫ്‌ളക്‌സ് ബോര്‍ഡുകള്‍ വന്നിരുന്നു. പുതുപ്പള്ളിയിലെ 141, 142 ബൂത്ത് കമ്മിറ്റികള്‍ ശശി തരൂരിന് അനുകൂലമായി പ്രമേയം പാസാക്കുകയും ചെയ്തു. മുതിര്‍ന്ന നേതാക്കള്‍ പരസ്യമായി മല്ലികാര്‍ജുന്‍ ഖാര്‍ഗെയ്ക്ക് പിന്തുണ പ്രഖ്യാപിക്കുമ്പോള്‍ താഴേത്തട്ടില്‍ കോണ്‍ഗ്രസ് പ്രവര്‍ത്തകരില്‍ ഒരു വിഭാഗം തരൂരിന്റെ കൂടെയാണെന്നാണ് ഇതില്‍ നിന്നും വ്യക്തമാകുന്നത്.