കൊച്ചി: മാധ്യമ പ്രവര്‍ത്തകരെ കോടതിയില്‍ തടഞ്ഞതുമായി ബന്ധപ്പെട്ട സംഭവത്തില്‍ കോഴിക്കോട് ടൗണ്‍  എസ്.ഐ വിമോദിനെതിരേ രജിസ്റ്റര്‍ ചെയ്ത രണ്ടു കേസുകളില്‍ ഒരെണ്ണം ഹൈക്കോടതി റദ്ദാക്കി.  രണ്ടാമത്തെ കേസില്‍ മാധ്യമ പ്രവര്‍ത്തകരെ അന്യായമായി തടങ്കലിലാക്കിയെന്നതൊഴികെയുള്ള കുറ്റങ്ങളും റദ്ദാക്കിയിട്ടുണ്ട്.
ജൂലായ് 30 നാണ് ഐസ് ക്രീം കേസുമായി ബന്ധപ്പെട്ട കോടതി നടപടികള്‍  റിപ്പോര്‍ട്ട് ചെയ്യാനെത്തിയ ഏഷ്യാനെറ്റ് ലേഖകന്‍ ബിനുരാജിനെയും മറ്റും എസ്.ഐയുടെ  നേതൃത്വത്തിലുള്ള പൊലിസ് സംഘം  കോടതിപരിസരത്തു നിന്ന് നീക്കിയത്. ഇവരുടെ വാഹനവും എസ്.ഐ പിടിച്ചെടുത്തിരുന്നു. പിന്നീട് ഉന്നത പൊലിസ് ഉദ്യോഗസ്ഥരടക്കമുള്ളവര്‍  ഇടപെട്ടതോടെ വിമോദിനെ താല്‍കാലികമായി ചുമതലയില്‍  നിന്ന് ഒഴിവാക്കി. എന്നാല്‍ ഇതിനുശേഷവും വിമോദ് സ്റ്റേഷനിലെത്തിയ മാധ്യമ പ്രവര്‍ത്തകരെ തടഞ്ഞുവച്ചു. സംഭവത്തെത്തുടര്‍ന്ന് രജിസ്റ്റര്‍ ചെയ്ത രണ്ടു കേസുകളും റദ്ദാക്കണമെന്നാവശ്യപ്പെട്ടാണ് വിമോദ്  ഹൈക്കോടതിയിലെത്തിയത്. ഹരജി പരിഗണിച്ച സിംഗിള്‍ബെഞ്ച് വിമോദിനെതിരേ ചുമത്തിയ  കുറ്റങ്ങളില്‍ അന്യായമായി തടങ്കലൊഴികെ കുറ്റകരമായ ഭീഷണിപ്പെടുത്തല്‍, ആയുധം ഉപയോഗിക്കാതെയുള്ള  ദേഹോപദ്രവമേല്‍പിക്കല്‍ തുടങ്ങിയ കുറ്റങ്ങള്‍ നിലനില്‍ക്കില്ലെന്നു വ്യക്തമാക്കിയാണ് ഒഴിവാക്കിയത്.  അന്യായമായി തടങ്കലിലാക്കിയെന്ന കുറ്റം നിലനില്‍ക്കുമോയെന്നത് അന്വേഷണത്തില്‍ വ്യക്തമാകേണ്ടതുണ്ടെന്നും  ഇതിനായി അന്വേഷണം തുടരാമെന്നുമാണ് ഉത്തരവില്‍ പറഞ്ഞിട്ടുള്ളത്.