ഫുട്ബോളിൽ ഇതിഹാസതാരം ലയണൽ മെസിക്കെതിരെ കളിച്ചപ്പോൾ ഉണ്ടായ അനുഭവത്തെക്കുറിച്ച് സംസാരിക്കുകയാണ് റയൽ മാഡ്രിഡിന്റെ എക്കാലത്തെയും മികച്ച ഇതിഹാസതാരങ്ങളിൽ ഒരാളായ മാഴ്സലോ. മെസിക്കെതിരെ കളിക്കുമ്പോൾ നേരിട്ട് വെല്ലുവിളികളെ കുറിച്ചാണ് ബ്രസീലിയൻ ഡിഫൻഡർ പറഞ്ഞത്. സ്പാനിഷ് ടിവി പ്രോഗ്രാമായ ലാ റെവുൽറ്റയിലൂടെ സംസാരിക്കുകയായിരുന്നു മാഴ്സലൊ.

'എനിക്ക് മെസിയെ ഒരുപാട് ഇഷ്ടമാണ്‌. അവൻ അതിശയകരമായ ഒരു താരമാണ്. കളിക്കളത്തിൽ മെസി വളരെ വേഗതയുള്ളവനായിരുന്നു. അവൻ എന്നെ മറികടന്നു പോകുന്നതു പോലും എനിക്ക് കാണാൻ സാധിക്കുമായിരുന്നില്ല. മെസിയെ പല തവണ ഞാൻ നേരിടാൻ ശ്രമിച്ചിരുന്നു. എന്നാൽ എനിക്ക് അദ്ദേഹത്തെ ഒരിക്കലും നേരിടാൻ കഴിഞ്ഞിട്ടില്ല,' മാഴ്സലൊ പറഞ്ഞു. 

സ്പാനിഷ് ലീഗിൽ റയൽ മാഡ്രിഡും ബാഴ്സലോണയും തമ്മിലുള്ള പല മത്സരങ്ങളിലും മെസിയും മാഴ്സലോയും നേർക്കുനേർ ഏറ്റുമുട്ടിയിട്ടുണ്ട്. ക്ലബ്ബ് തലത്തിലും രാജ്യാന്തര തലത്തിലും 33 മത്സരങ്ങളിലാണ് മാഴ്സലൊ മെസിക്കെതിരെ കളിച്ചിട്ടുള്ളത്. റയൽ മാഡ്രിഡിനായി 2007 മുതൽ 2022 വരെയാണ് മാഴ്സലൊ ബൂട്ട് കെട്ടിയത്. സ്പാനിഷ് വമ്പൻമാർക്കൊപ്പം 25 കിരീടങ്ങളാണ് താരം നേടിയത്. മാഴ്സലൊ നീണ്ട വർഷക്കാലം റയൽ മാഡ്രിഡിനൊപ്പം അവിസ്‌മരണീയമായ ഒരു ഫുട്ബോൾ യാത്രയാണ് നടത്തിയത്.

മെസി 2021ലാണ് ബാഴ്സലോണയിലെ ഐതിഹാസികമായ കരിയർ അവസാനിപ്പിച്ചുകൊണ്ട് ഫ്രഞ്ച് വമ്പൻമാരായ പാരീസ് സെയ്ന്റ്  ജെർമെയ്‌നിലേക്ക് ചേക്കേറിയത്.  ഫ്രഞ്ച് ക്ലബിനൊപ്പം രണ്ട് സീസണുകളിലാണ് മെസി കളിച്ചിരുന്നത്. പിഎസ്ജിക്ക്‌ വേണ്ടി രണ്ട് സീസണുകളിലായി 32 ഗോളുകളും 35 അസിസ്റ്റുകളുമാണ് മെസി നേടിയത്. ടീമിനൊപ്പം രണ്ട് ലീഗ് കിരീടങ്ങളും മെസി സ്വന്തമാക്കിയിരുന്നു. 

2023ലാണ് മെസി പാരീസ് വിട്ട് മേജർ ലീഗിലേക്ക് പോയത്. നിലവിൽ ഇന്റർ മയാമിക്ക് വേണ്ടി മിന്നും പ്രകടനമാണ് മെസി നടത്തിക്കൊണ്ടിരിക്കുന്നത്. 36 ഗോളുകളും 20 അസിസ്റ്റുകളും ആണ് മെസി ഇന്റർ മയാമിക്ക് വേണ്ടി നേടിയത്. ക്ലബ്ബിന്റെ ചരിത്രത്തിൽ ഇതുവരെ ഇല്ലാതിരുന്ന ലീഗ്‌സ് കപ്പ് കിരീടവും മെസിയുടെ നേതൃത്വത്തിൽ ആണ് മയാമി സ്വന്തമാക്കിയത്. ഇതിന് പുറമെ സപ്പോർട്ടേഴ്‌സ് ഷീൽഡും മയാമി സ്വന്തമാക്കി.